પ્રવાસન

વર્ષાના સૌંદર્યનો મુકામ લવાસા

- રક્ષા ભટ્ટ

મેઘરાજા મહેરબાન થયા છે અને ભારતમાં અત્ર-તંત્ર સર્વત્ર અનરાધાર વરસાદ સૌને ભીંજવી રહ્યો છે, ત્યારે ક્યાંક એવા ગંતવ્ય તરફ ગતિ કરવાનું મન થાય છે, જ્યાં પહાડો હોય, જળધોધ હોય, તળાવો હોય, લશગ્રીન ખેતરો હોય, નજર નાખો ત્યાં સુધી ટેકરીઓ જ ટેકરીઓની હારમાળા હોય અને હોય વાદળ, ધુમ્મસ, વરસાદ અને સ્ટ્રોન્ગ કૉફી કે આદુવાળી કડક ચા વિથ પકોડા ઔર વેજિટેબલ મેગી, વો ભી ગરમા-ગરમ ધુમાડા કાઢતી.

આ બધું અને આનાથી પણ વિશેષ પણ મળે, જો આપણે ભારતના પ્રથમ પ્લાન્દ્ સિટી લવાસા જઈએ તો. પુનાથી માત્ર ૬૫ કિલોમીટર દૂર આવેલું આ લવાસા પશ્ચિમઘાટની પશ્ચાદભૂમાં પાંગરેલું ભારતનું પ્રથમ હિલ સ્ટેશન છે, જે ભારતના પ્રથમ પ્રાઇવેટલી ક્રિએટેડ સ્માર્ટ સિટી તરીકે જાણીતું છે.

ઇટાલિયન ટાઉન પોર્ટોફીનો પ્રમાણે ડિઝાઇન થયેલું લવાસા એવું પ્લા હિલ સિટી છે, જેનાં મકાનો અને શેરીઓનાં નામો પણ પોર્ટોફીનોની નકલ છે અને ખરેખર ઇટાલીના આ હિલસાઇડ ટાઉનની ફીલ આપે છે.

પશ્ચિમ ઘાટની મુલશી વેલીમાં આવેલું લવાસા એક સમયગાળામાં ઘોસ્ટ ટાઉન હતું, જ્યાં રેડી ટુ મૂવ ઍપાર્ટમેન્ટ્સ તો હતાં, પરંતુ તેમાં રહેવાવાળા નહોતા અને આ ઍપાર્ટમૅન્ડ્સને લીલ તો ચડી જ ગઈ હતી, પરંતુ કેટલાંક ઍપાર્ટમૅન્ટ્સનું બાંધકામ પણ અધૂરું હતું કે તેના માલિકો તેને છોડીતરછોડીને જતાં રહ્યા હતા.

પર્યાવરણ, પ્રોપર્ટી, પરચેઝિંગ અને પાણી જેવા અનેક વિવાદોને ચાતરીને આજના લવાસા સુધી પહોંચવાવાળા વર્ષાપ્રેમી પ્રવાસીઓ કે મુંબઈ-પુનાના વિકેન્ડર્સ તો શનિ-રવિમાં પોતાની ગાડી વેસ્ટર્ન ઘાટના આ મોન્સુનલ ડેસ્ટિનેશન તરફ હંકારીને બે-ત્રણ દિવસ આ ઇટાલિયન ટાઉનમાં વીતાવે છે.

લૅક સાઇડ વ્યૂના પેસ્ટલ કલર્ડ બિલ્ડિંગ અને વેસ્ટર્ન ઘાટના મોન્સૂન મૂડ સુધી પહોંચવા સૌ પ્રથમ પુના પહોંચી પુનાથી હિંજેવાડી, પિરંગુટ થઈ લવાસા પહોંચતા વેસ્ટર્ન ઘાટના આ રૂટ પર આવતી લીલીછમ ટેકરીઓ, વરસાદ અને હાઈવે પરના રેસ્ટોરન્ટની ચા-કૉફી અને ભાવતું ભોજન જ રોડ ટ્રિપના રખડુ જલસાથી ઍક્શનપેક હોય છે.