સિદ્ધિ અને પરસેવો : અતૂટ બંધન!

જે વ્યક્તિ શ્રમથી રળેલો રોટલો નથી ખાતી એ વ્યક્તિને

- હર્ષદ પંડ્યા ‘શબ્દપ્રીત'

થોડા દિવસ પહેલાં જ બાબુ બૉસના જીવનમાં એક ઘટના બની. આ ઘટનાને પરસેવાજનક ઘટના પણ કહી શકાય. વાત જાણે એમ હતી કે ગયા અઠવાડિયે જ બાબુપત્ની બબિતાએ બાબુને સિઝનલ પ્રશ્ન પૂછ્યો, ‘તમે AC નું ફુલ કૂલિંગ કરીને બેઠા છો તોય પરસેવો કેમ વળે છે? આ જુઓ, તમારા ચહેરા પર પરસેવાના બુંદ બાઝયા છે...’

‘ACનું કૂલિંગ ગમે તેટલું હાઈ રાખ્યું હોય તો પણ પરસેવો તો મને વળવાનો જ,' બાબુએ એકદમ મિ. ફૂલ બનીને કહ્યું, ‘આપણી સામે કે બાજુમાં આકરો તડકો હોય કે આકરા સ્વભાવવાળી વ્યક્તિ હોય તો એની આગળ ફાઇવ સ્ટારવાળું AC પણ પરસેવો પાડતું થઈ જાય

‘કેમ આમ દાઢમાં બોલો છો?' બિબિતાએ સહેજ ગરમ અવાજે કહ્યું, ‘હું તો તમારી તબિયતની ચિંતા કરીને પૂછું છું... પ્રેશરમાં વધ-ઘટ થતી હોય તો પણ આટલા કૂલિંગમાં પરસેવો વળે. કેટલીવાર કહ્યું છે કે, BP ચૅક કરાવતા રહો, પણ મારું માને એ બીજા...'

‘પ્રેશર બ્રેસર હોય,’ બાબુએ હજુ પણ રમૂજ ચાલુ જ રાખી, ‘જોને, ગરમી જ કેવી છે! બહાર હોય એના કરતાંય પ્રેશર અંદર વધારે છે!' .

‘પાછા દાઢમાં બોલ્યા!' બબિતા હસી પડી.

‘સિદ્ધિ તેને જઈ વરે, જે પરસેવે ન્હાય’ – એ ‘સપ્તપદી’ મંત્ર (સાત શબ્દનો મંત્ર)માં જે કહેવાયું છે એ સાચું, પણ જીવનમાં સિદ્ધિ મેળવવી હોય તો પરસેવાથી હાથ-પગ મો ધોઈને બેસી જવાથી ના મળે, પરસેવે ન્હાવું પડે. અત્તર કે ગુલાબજળની જેમ ચહેરા પર કે કપડાં પર પરસેવાનો સ્પ્રે કરવાથી કંઈ કામ પતી જતું નથી. સાચા અર્થમાં સિદ્ધિ મેળવવી હોય તો છૂટક પરસેવામાં છબછબિયાં ના કરાય, એ માટે તો પરસેવામાં શાહીસ્નાન કરવું પડે. સિદ્ધિ કંઈ એટલી સીધી નથી કે આમ ચપટી વગાડતામાં મળી જાય!

ભગવાને ઉનાળાની ઋતુનું નિર્માણ જ એટલા માટે કર્યું છે કે આપણે હોલસેલના ભાવમાં પરસેવો પાડતા રહીએ અને ડઝનના ભાવે સિદ્ધિઓ મેળવતા રહીએ.

‘ગીતા પ્રવચનો’માં વિનોબા ભાવેએ લખ્યું છે કે જે વ્યક્તિ શ્રમથી રળેલો રોટલો નથી ખાતી એ વ્યક્તિને મનુષ્ય તરીકે ઓળખાવવાનો કોઈ જ અધિકાર નથી. જોકે વિનોબાજીએ આ લખ્યું હશે ત્યારે એમના દિમાગમાંથી રાજકારણીઓ ભૂલાઈ ગયા હશે! ટૂંકમાં, એમનું કહેવું એવું છે કે મહેનતનો રોટલો જે ખાય એને જ મનુષ્ય કહી શકાય.