શ્રદ્ધાંજલિ

વહીવટની વાતોના આલેખક કુલીનચંદ્ર યાજ્ઞિકની વિદાય

- તરુણ દત્તાણી

એક સંતૃપ્ત જીવનનું ઉદાહરણ આપણી સમક્ષ મૂકીને કુલીનચંદ્ર યાજ્ઞિકે આપણી વચ્ચેથી વિદાય લીધી છે. ૯૮ વર્ષના ઉંબરને ઓળંગવાને થોડા દિવસોનો અંતરાય હતો, આ ઉંમરે પણ આખર સુધી શક્ય તેટલી સક્રિયતા જાળવી રાખી લેખન અને અધ્યયનને ક્યારેય છોડ્યા નહીં. શાસનના અનેક હોદ્દાઓ પર રહીને કુશળ, કાર્યક્ષમ અને સંનિષ્ઠ વહીવટ દ્વારા પદને દીપાવવાની કળા તેમને સહજ સાધ્ય હતી. તમામ પ્રકારના પૂર્વાગ્રહો અને દુરાગ્રહોથી મુક્ત રહીને પ્રામાણિકતાપૂર્વક કામ કરવાની તેમની આગવી શૈલી હતી. શાસનના સૂત્રો સંભાળનારા લોકો કરતાં તેમને સોંપાયેલી જવાબદારી અને વહીવટ પ્રત્યેની તેમની સંનિષ્ઠા અને પ્રતિબદ્ધતા અનન્ય પ્રકારની રહી. વહીવટને સુગમ બનાવવાની કળા તેમને હસ્તગત હતી. આંટીઘૂંટીની વાત નહીં. ૧૯૫૧માં મામલતદાર તરીકે સરકારી નોકરીની શરૂઆત કર્યા બાદ ૧૯૬૮માં આઇએએસ કક્ષા સુધી પહોંચ્યા પછી વિવિધ સ્થાનો કલેક્ટર તરીકેની પ્રશંસનીય કામગીરી અને રાજ્યપાલ અને મુખ્યપ્રધાનના સેક્રેટરી તરીકે એકી સાથે સફળતાપૂર્વક ફરજ બજાવવાનો વિક્રમ કદાચ તેમનો એકનો જ છે.