કચ્છમાં વાવાઝોડું નુકસાનીની સાથે-સાથે મહેરબાની પણ

ડીપ-ડિપ્રેશનના કારણે પડેલા સચરાચર વરસાદના પગલે કચ્છનાં નદી, નાળાં, ડેમ, તળાવો છલકાઈ ગયાં છે. જેનો લાભ ખેતીને થશે, ભૂગર્ભજળ ઊંચા આવશે. જોકે સતત વરસતા વરસાદે ચારેક લોકોએ જીવ ગુમાવ્યા છે, રસ્તાઓને ભારે હાનિ પહોંચી છે, રેલવે વ્યવહાર ખોરવાયો છે. શહેરો અને ગ્રામ વિસ્તારમાં પાણી ભરાવાની સમસ્યાથી જનજીવનને ભારે અસર પહોંચી છે. અમુક જગ્યાએ સંદેશાવ્યવહાર ઠપ થઈ ગયો છે. ખેતરોમાં પાણી ભરાયા છે.

- સુચિતા બોઘાણી કનર

બે દાયકા પહેલાં કચ્છની દુષ્કાળગ્રસ્ત વિસ્તાર તરીકે ગણના થતી હતી, પરંતુ ભૂકંપ પછી પરિસ્થિતિ બદલાઈ છે. વરસાદ વધ્યો છે. તેમાં પણ છેલ્લાં પાંચ-છ વર્ષથી વરસાદનું પ્રમાણ નિરંતર વધી રહ્યું છે. ગત વર્ષે જૂન માસમાં બિપ૨જોય વાવાઝોડાના કારણે રાજ્યમાં સૌથી વધુ વરસાદ કચ્છમાં થયો હતો. આ વરસે ચોમાસાની શરૂઆત તો સારી રહી હતી, પરંતુ ગત વર્ષના પ્રમાણમાં ઓછો વરસાદ હતો, જેની ખોટ અત્યારે આવેલા ડીપ ડિપ્રેશને પૂરી કરી નાખી છે. અત્યારની સ્થિતિએ પણ રાજ્યમાં સૌથી વધુ વરસાદ કચ્છમાં જ થયો છે. તા. ૨૮મીના સરકારી આંકડાઓ મુજબ, કચ્છમાં ૬૧૪ મી.મી. વરસાદ નોંધાયો છે. જ્યારે જિલ્લાનો સરેરાશ વરસાદ ૪૮૫ મી.મી. છે. આમ અત્યાર સુધીમાં ૧૨૬.૬૨ ટકા જેટલો વધુ વરસાદ નોંધાયો છે. આ લખાય છે, ત્યારે પણ હજુ પણ વધુ વરસાદ વરસવાનું ચાલુ છે.