એક દેશ એક ચૂંટણીના અમલનો માર્ગ મુશ્કેલ છે

સરકારે લોકસભામાં બિલ રજૂ કરી દીધું છે, પરંતુ તેને સંસદનાં બંને ગૃહોમાં પસાર કરાવવાનું મુશ્કેલ બનવાનું છે

- ચાણક્ય

નરેન્દ્ર મોદીની સરકારે વન નેશન – વન – – ઇલેક્શન એટલે કે એક દેશ એક ચૂંટણીના વિચારને અમલમાં મૂકવાની તૈયારી શરૂ કરી છે. વર્ષોથી આ મુદ્દે વડાપ્રધાન ચર્ચા કરતા હતા. હવે સરકારે તેને વિશેનું બિલ લોકસભામાં રજૂ કરી દીધું છે. થોડા દિવસો પહેલાં જ આ બંધારણ સુધારા બિલને કેબિનેટે મંજૂરી આપી હતી. હવે આ બિલને સરકાર સંયુક્ત સંસદીય સમિતિને મોકલશે. એક દેશ એક ચૂંટણી માટે સરકારે બે ખરડા રજૂ કર્યા છે. એક ખરડો બંધારણ સુધારા અંગેનો છે, જ્યારે બીજો ખરડો જમ્મુ-કાશ્મીર અને દિલ્હી સહિત કેન્દ્ર શાસિત પ્રદેશોમાં એકીસાથે ચૂંટણી કરાવવા અંગેનો છે. દેશભરમાં લોકસભા અને રાજ્ય વિધાનસભાઓની ચૂંટણી એકીસાથે કરાવવા અંગે ગત વર્ષે સપ્ટેમ્બર મહિનામાં પૂર્વ રાષ્ટ્રપતિ રામનાથ કોવિંદની અધ્યક્ષતામાં એક સમિતિની રચના કરવામાં આવી હતી. આ સમિતિએ ગત માર્ચ મહિનામાં તેનો રિપોર્ટ સરકારને સોંપી દીધો હતો. સપ્ટેમ્બર મહિનામાં કેબિનેટે આ રિપોર્ટને મંજૂરી આપી હતી.