પૉપ્યુલર ફ્રન્ટ ઑફ ઈન્ડિયા ક્યાં સુધી આ સાપને દૂધ પિવડાવશું?

‘સ્ટુડન્ટ્સ ઈસ્લામિક મૂવમેન્ટ ઑફ ઈન્ડિયા (સીમી)’ જેવા ભારતવિરોધી સંગઠન પર પ્રતિબંધ મુકાતાં અઢી-ત્રણ દાયકા વીતી ગયા હતા, ત્યાં સુધીમાં એ સંગઠને દેશને પહોંચાડવાનું હતું એટલું નુકસાન પહોંચાડી દીધું. ‘સીમી’ પછી તરત ‘પૉપ્યુલર ફ્રન્ટ ઑફ ઈન્ડિયા’ દેશમાં ખુલ્લેઆમ આતંકનાં બીજ રોપવાના કામમાં લાગી ગયું અને છેલ્લા દોઢ દાયકાથી હવે આ ‘સીમી’ના જ ભાઈ જેવા દેશદ્રોહી સંગઠન પર પ્રતિબંધની રાહ જોવાઈ રહી છે.

- ઉમંગ વોરા

દેશવિરોધી કારનામામાં સંડોવણીની શંકા પરથી ‘પીએફઆઈ’ના આોવાનોની ધરપકડ થઈ એના વિરોધમાં ઠેર ઠેર થયા દેખાવ.

મને કોઈના પ્રત્યે અંગત આક્રોશ કે ગુસ્સો હવે નથી રહ્યો, પણ ‘પીએફઆઈ’ (પૉપ્યુલર ફ્રન્ટ ઑફ ઈન્ડિયા) જેવાં દેશવિરોધી સંગઠનોને ભારતમાંથી જડમૂળથી ઉખેડી દેવાં જોઈએ એટલી મારી માગણી છે.

આ શબ્દો છે કેરળના એક કૉલેજ પ્રોફેસર ટી. જોસેફના. વર્ષ ૨૦૧૧માં પીએફઆઈના કાર્યકરોએ એમનો એક હાથ કાપી નાખ્યો હતો. ત્યાર બાદ કટ્ટરપંથીઓની ધમકીઓથી ડરીને એમનાં પત્નીએ આત્મહત્યા કરવી પડી. નોકરી છૂટી જતાં પ્રોફેસરે મિત્રોના આર્થિક ટેકા પર નભવું પડ્યું. એ પ્રોફેસરની ભૂલ એટલી હતી કે એમણે પ્રશ્નપત્રમાં વ્યાકરણની સમજ માટેના ફકરામાં અસ્થિર મગજના એક પાત્રનું નામ મોહમ્મદ રાખ્યું હતું!

એ વખતે અખબારો માટે પીએફઆઈનું નામ નવું હતું, પણ એમાં કામ કરતા માણસો અને વિચારધારા એ જ જૂનાં ને જાણીતાં હતાં: ભારતને ઈસ્લામિક રાષ્ટ્ર બનાવો અને શરિયા કાનૂન લાવો!

હવે દાયકા પછી અખબારો અને સમાચારોમાં પીએફઆઈનું નામ બહુ ગાજ્યું છે. ગયા સપ્તાહે (૨૨ સપ્ટેમ્બરે) નૅશનલ ઈન્વેસ્ટિગેશન એજન્સી, એન્ફોર્સમેન્ટ ડિરેક્ટોરેટ (ઈડી), વિવિધ રાજ્યનાં પોલીસદળો અને ઍન્ટિ-ટેરરિસ્ટ સ્ક્વૉડ (એટીએસ) સહિતની એજન્સીઓ સાથે મળીને એક જ દિવસમાં એકસાથે ૧૫ રાજ્યોમાં પીએફઆઈ અને એની સાથે સંકળાયેલા રાજકીય પક્ષ સોશિયલ ડેમોક્રેટિક પાર્ટી ઑફ ઈન્ડિયા (એસડીપીઆઈ)નાં કાર્યાલય મળીને કુલ ૯૩ સ્થળે દરોડા પાડ્યા અને સંગઠનના ૧૦૬ લોકોની ધરપકડ કરી. એ કારણે પીએફઆઈ ફરી ચર્ચાને ચકડોળે છે. આમ તો છેલ્લાં વર્ષોમાં બીજાં પણ કેટલાંક કટ્ટરપંથી કારનામાંને કારણે પીએફઆઈનું નામ છાશવારે ઊછળતું રહ્યું છે.

૨૦૧૧માં પ્રોફેસર જોસેફનો હાથ કાપ્યા પછી તો ૨૦૧૬ અને ૨૦૧૭માં રાષ્ટ્રીય સ્વયંસેવક સંઘ (આરએસએસ) અને બજરંગ દળના કાર્યકરોની હત્યા, ૨૦૧૯માં એક કોંગ્રેસી ધારાસભ્ય પર ઘાતક હુમલો અને તામિલનાડુમાં સામાજિક કાર્યકરની હત્યા, વગેરે અનેક બનાવમાં પીએફઆઈની ઉઘાડી સંડોવણી છે.

ક્યાંથી થયો ‘પીએફઆઈ નો જન્મ?