પરીક્ષા મોકૂફ રહી.. સરકાર નાપાસ થઈ!

નવ વર્ષમાં ગુજરાતમાં સરકારી નોકરીની સ્પર્ધાત્મક પરીક્ષાનાં એક-બે નહીં, પણ બાર પેપર લીક થયાં છે.

વડોદરાની આ ઑફિસ છે પેપર લીકેજનું એપિસેન્ટર?

ગુજરાતનાં હજારો યુવક-યુવતીઓએ ઈષ્ટ દેવ-દેવીને પ્રાર્થના કરી, માતા-પિતા અને વડીલોના આશીર્વાદ લઈને કે પછી બાધા-માનતા રાખીને ઘેરથી પરીક્ષા આપવા નીકળ્યાં. ૨૯ જાન્યુઆરી ને રવિવારે સવારે ૧૧ વાગે રાજ્યનાં ૨૯૯૫ કેન્દ્રો પર જુનિયર ક્લર્કની સ્પર્ધાત્મક પરીક્ષા યોજાવાની હતી. જગ્યા તો હતી માત્ર ૧૧૮૧, પણ એ માટે ઉમેદવાર હતા આશરે સાડા નવ લાખ!

મોટા ભાગના ઉમેદવારોએ રાત-દિવસના ઉજાગરા વેઠી, કોચિંગ ક્લાસની તગડી ફી ભરીને પરીક્ષાની તૈયારી કરી હતી. એ ગરીબ અને મધ્યમવર્ગી ઘરનાં યુવક-યુવતીઓને મહેનત અને બુદ્ધિના બળે પરીક્ષા પાસ કરીને સરકારી નોકરી મેળવવાની આશા હતી.

- પરંતુ પરીક્ષા શરૂ થવાના થોડા કલાક પહેલાં પરીક્ષા આયોજક ગુજરાત પંચાયત સેવા પસંદગી મંડળે ચોંકાવનારી ખબર પ્રસરાવીઃ -

પરીક્ષાના પ્રશ્નપત્રની નકલ સાથે પોલીસે સોળ આરોપીઓની અટકાયત કરી છે એથી ઉમેદવારોનાં હિતમાં આજની પરીક્ષા મોકૂફ રાખી છે!

આ વાંચી કે જાણીને ઘણા ઉમેદવારો રીતસર રડી પડ્યા. ઘણા વ્યથિત, ચિંતિત અને ક્રોધિત થયાઃ મહિનાઓથી કરેલી અમારી મહેનત અને એ માટે ખર્ચેલા પૈસા પાણીમાં ગયા. ભરોસાની સરકારે અમારો ભરોસો તોડ્યો.. કેટલાકે તો સોશિયલ મિડિયા પર પ્રકોપ ઠાલવ્યોઃ શું ગુજરાત સરકાર સૌથી વધુ પેપર ફૂટ્યાનો રેકૉર્ડ બનાવવા માગે છે?!