દીકરો ન જણે તો સ્ત્રી અપૂર્ણ ગણાય એ ક્યાંનો ન્યાય?

પુત્રજન્મનો મોહ ફક્ત અભણ કે પછાત વર્ગના લોકોમાં જ નહીં, કહેવાતી હાઈ સોસાયટીના પરિવારોમાં પણ જોવા મળે છે.

- ડૉ. મિતાલી સમોવા

કુદરતે વારસા તરીકે જનીનોની વહેંચણી વખતે દીકરા કે દીકરીમાં ભેદભાવ કર્યો નથી. બન્નેને સમાન પ્રમાણમાં પોતાનાં માતા-પિતા તરફથી ગુણો મળતા હોય છે. એક પણ જનીન ઓછું કે વધારે નહીં! જો કે માનવઉત્ક્રાંતિની કોઈ એક ક્ષણે કોઈ વિકૃત મહત્ત્વાકાંક્ષી માનસિકતા ધરાવતી વ્યક્તિએ પિતૃસત્તાની સ્થાપના કરવાનું વિચાર્યું અને ત્યાર બાદ એને વાજબી ઠેરવવા માટે દીકરો હોય તો જ પરિવારનો વંશ આગળ વધે અને ફક્ત દીકરો જ પિંડદાન કરી શકે જેવું વાહિયાત તૂત ઊભું કરી દીધું. આ બિનકુદરતી વ્યવસ્થાને ટકાવી રાખવા પછી અમુક લોકો જાતજાતના ધાર્મિક, સામાજિક, રાજકીય પ્રપંચો કરતા રહ્યા, જેના લીધે આજે આ બિલકુલ તર્કહીન માન્યતા સમાજમાં પાક્કા પાયે ઘર કરી ગઈ છે.

સામાન્ય રીતે આપણે એવું માનીએ છીએ કે ભારત દેશમાં પુત્રજન્મનો મોહ ફક્ત અભણ કે પછાત વર્ગમાં જ જોવા મળે છે, પરંતુ એ હકીકત નથી. આપણે ત્યાં ગમે એટલા ગરીબ કે અમીર, ભણેલા કે અભણ, ગ્રામ્ય કે શહેરી, ગમે તે ધર્મ-જાતિના પરિવારમાં પુત્રજન્મ માટે ગાંડપણ જોવા મળતું હોય છે. પુત્રજન્મ માટે કરવામાં આવતાં ગમે તેવાં બુદ્ધિહીન કાર્યો-જાદુ ટોનાદવા-ભૂવાભોપાળાને આખો સમાજ સ્વીકાર્ય સ્વાધ્યય કરે છે. ઘણા વાર તો આવાં ગાંડપણ એની માનવીય મર્યાદા સુદ્ધાં ચૂકી જાય છે.