શ્રી દાક્ષિણ્યના પાઠ ઘર અને સ્કૂલથી જ શીખવીએ...

કોઈ પણ યુવતી આપણા માટે ‘તૈયાર’ છે એવી વિકૃત સમજ બદલવાની પુરુષે જરૂર નથી?

- ડૉ. મિતાલી સમોવા

દુનિયાભરમાં મહિલાસુરક્ષા એક એવો મુદ્દો છે કે જેમાં કોઈ પણ પ્રકારની રોમિયો સ્ક્વૉડ બનાવવાથી કે કોરડાના દંડ ફટકારવાથી સુધારો થવાનો નથી. એનો એકમાત્ર ઈલાજ છે, દીકરાઓને સાંસ્કૃતિક બદલાવ અને સ્ત્રીદાક્ષિણ્ય બાબતે શિક્ષણ અને તાલીમ આપવાનો. આપણે ભારત વાસીઓ આપણી સ્ત્રીદાક્ષિણ્યની સંસ્કૃતિ માટે ફૂલ્યાં સમાતાં નથી અને ઈતિહાસનાં અમુક પડળો ખરેખર સ્ત્રીઓ માટે સુવર્ણયુગ રહ્યાં છે એ વિશે બેમત પણ નથી, પરંતુ એ સુવર્ણયુગ કંઈ કાયમ માટે રહ્યો નથી. દુનિયાના બીજા દેશોની જેમ જ આપણે ત્યાં પણ મોટા ભાગનો સમયગાળો સ્ત્રીઓ માટે પરેશાનીયુક્ત અને અપમાનજનક રહ્યો છે એ હકીકત છે. ભૂતકાળમાં પણ હતી અને અત્યારે પણ મહિલાસુરક્ષા આ વિશ્વની સૌથી મોટી સમસ્યા છે. અંધધાર્મિક પિતૃસત્તાક સમાજવ્યવસ્થાએ સ્ત્રીઓને બુરખા અને ઘૂંઘટમાં કેદ કરીને પણ જોઈ લીધું અને બિકિનીની છૂટ આપીને પણ. બન્ને પરિસ્થિતિમાં મહિલાની અવસ્થા ઠેરની ઠેર જ રહી છે.