સંબંધોના સંઘર્ષમાં ભગવદ્દગીતાનું મૅનેજમેન્ટ

આપણા દરેકના જીવનમાં આપસી ટકરાવ હોય છે અને આપણનેય એવાં સમાધાનની જરૂર હોય છે, જેમાં સૌનું હિત જળવાય. કૉન્ફ્લેિક્ટ મૅનેજમેન્ટ એટલે ટકરાવની પરિસ્થિતિમાં એની નકારાત્મક બાજુને સીમિત કરવી અને સકારાત્મક બાજુને વિસ્તારવી.

- રાજ ગોસ્વામી 

એક ઝેરી વાર્તા...

એક ગામમાં સાસુ-વહુ વચ્ચે બહુ ઝઘડા ચાલતા હતા. વહુ નવા જમાનાની સ્વતંત્ર મિજાજી હતી. સાસુ જુનવાણી અને દાદાગીરીવાળી હતી.

વહુ એક દિવસ કંટાળીને પિતાના વૈદ્ય મિત્ર પાસે ગઈ ‘મને એવું ઝેર આપો કે મારી સાસુ કાયમ માટે ઊંઘી જાય. એનો ત્રાસ સહન થતો નથી.'

વૈદ્ય સમજદાર હતા. એમણે કહ્યું: ‘બેટા, એવી રીતે ઝેર ન અપાય. લોકોને ખબર પડી જાય. હું તને બીજી દવા આપું છું, પણ તારે હું કહું તેમ કરવું પડશે.’

વહુએ હકારમાં માથું હલાવ્યું.

વૈદ્યે એને ચાર-પાંચ જડીબુટ્ટીનો પાવડર આપીને કહ્યું: ‘આમાંથી તું રોજ એક ચમચી પાવડર સાસુના ખાવામાં નાખજે. આ ધીમું ઝેર છે. છ મહિના સુધી એની અસર નહીં દેખાય. એ પછી સાસુ બીમાર પડવા લાગશે અને પછી મરી જશે. હવે તારી પર શંકા ન જાય એટલે તારે તારી સાસુને સામો જવાબ નહીં આપવાનો. એ કહે એમ કરવાનું, દીકરીની જેમ રહેવાનું, એમની પૂરતી સેવા કરવાની.

વહુ ખુશ થઈને ઘરે આવી અને બીજા જ દિવસથી સાસુ સાથે નમ્ર બનીને વર્તવા લાગી. સાસુને શંકા ન પડે એ રીતે ખાવામાં ઝેર મેળવતી જાય અને એમને પ્રેમ કરતી જાય. વહુની જીભ મીઠી થઈ ગઈ. સાસુ ગમે એટલું આકરું બોલે, વહુ હસતાં મોઢે સહન કરી લે.

ધીમે ધીમે સાસુનો પારો પણ ચઢતો બંધ થઈ ગયો. એમને વહુ પ્રત્યે પ્રેમ ઊભરાવા લાગ્યો. જે કામ એ વહુ પર નાખતાં હતાં એ જાતે જ કરવા લાગ્યાં. છ મહિનામાં તો ઘરનું વાતાવરણ બદલાઈ ગયું. બન્ને વચ્ચે ઝઘડા સાવ જ ખતમ થઈ ગયા.

છ મહિના પછી વહુ પાછી વૈદ્ય પાસે ગઈ અને કહ્યું: ‘મને મદદ કરો. મારાં સાસુ સુધરી ગયાં છે અને મને દીકરીની જેમ રાખે છે. મારે એમને હવે જિવાડવાં છે. ઝેરને મારવાની દવા આપો.’

વૈદ્ય હસ્યા અને કહ્યું: ‘બેટા, ચિંતા ન કરીશ. એ ઝેર નહોતું. ખાંડનો પાવડર હતો. ઝેર તો તારા મનમાં હતું, પણ સાસુ પ્રત્યેના પ્રેમમાં એ ઝેર ધોવાઈ ગયું છે. જા ઘરે, હવે સાસુ તને આવી જ રીતે પ્રેમ કરશે.’