સોનાના ભાવમાં તેજી...ખરીદીમાં મંદી

ભારતમાં લોકસભાની ચૂંટણીની રાજકીય ગરમી વચ્ચે અર્થતંત્રને અસર કરતી બે મોટી માર્કેટમાં ઊથલપાથલ દેખાય છે. સામાન્ય રીતે શૅરબજાર તેજ હોય ત્યારે બુલિયનમાં મંદીનો ટ્રેન્ડ હોય છે. ક્યારેક આનાથી ઊંધું ચિત્ર હોય છે, પરંતુ નવા નાણાકીય વર્ષની શરૂઆતથી શૅરબજાર અને સોનાના ભાવમાં એકસાથે તેજી જોવા મળી રહી છે. સોનામાં આમ આદમીથી માંડી ધનિકોને પણ રસ પડે છે. સોનાના ભાવ ઑલ ટાઈમ હાઈ થયા છે ત્યારે જાણીએ એનાં કારણ-તારણ.

- દેવેન્દ્ર જાની (રાજકોટ)

અર્થતંત્રમાં ગમે એવા ચડાવ-ઉતાર આવે, પરંતુ સોનામાં રોકાણ કરનારાને ક્યારેય પસ્તાવાનો વારો આવ્યો નથી. સોનું માત્ર રોકાણ માટે જ નહીં, પણ ભારતીય સંસ્કૃતિ, પરંપરા અને રીતરિવાજો સાથે જોડાયેલું છે એટલે સોનાના વપરાશમાં દુનિયામાં એક મહત્ત્વના દેશ તરીકે ભારતનું સ્થાન છે. વર્ષે આશરે ૮૦૦ ટન સોનાના વપરાશ સાથે દુનિયામાં ચીન પછી ભારત બીજા નંબરે છે. વર્લ્ડ ગોલ્ડ કાઉન્સિલના અહેવાલ મુજબ, અમેરિકી સરકારની તિજોરી કરતાં ત્રણ ગણું સોનું ભારતીય લોકોનાં ઘરમાં સચવાયેલું છે. અમુક મંદિરોની તિજોરી પણ સોનાથી છલોછલ છે.

રાજકોટની સોનીબજાર: આ હાલતમાં ગ્રાહકો દુકાન તરફ પગ પણ કઈ રીતે મૂકે?

ભારતમાં લગ્ન કે અન્ય શુભ પ્રસંગોએ સોનું ખરીદવાનો રિવાજ છે.  આપણે ત્યાં સોનાની ખપતમાં સૌથી મોટો હિસ્સો જ્વેલરી-આભૂષણોનો છે. ભારતીયો આર્થિક સંકટના સમયે કામ આવે એ હેતુથી સોનું ખરીદતા હોય છે.

ત્રણેક વર્ષ પહેલાં ભારતની માર્કેટમાં ૨૪ કૅરેટના ૧૦ ગ્રામ સોનાના ભાવ આશરે રૂપિયા ૫૫,૦૦૦ હતા, એ અત્યારે ૭૫,૦૦૦ રૂપિયાની સપાટી વટાવી ચૂક્યા છે. પાછલા બે મહિનામાં જ દસ ગ્રામના ભાવ ૧૫,૦૦૦ રૂપિયા વધ્યા છે. અરે, બાવીસ કૅરેટ સોનાના ભાવ રૂપિયા ૬૭,૦૦૦થી વધુ છે પરિણામે સોનાની નવી ખરીદીને બ્રેક લાગી છે. લગ્ન જેવા પ્રસંગોમાં થતી ખરીદી અત્યારે ઊંચા ભાવને કારણે લોકો ટાળી રહ્યા છે. સાથોસાથ જૂનું સોનું એક્સચેન્જ કરવાનો ટ્રેન્ડ મોટાં શહેરોમાં જોવા મળી રહ્યો છે.

ઈન્ડિયન બુલિયન માર્કેટમાં રાજકોટનો દબદબો છે. દેશ-દુનિયાની ગોલ્ડ માર્કેટમાં રાજકોટની જ્વેલરી એની ગુણવત્તા અને કારીગરી માટે પ્રખ્યાત હોવાથી વર્ષોથી ગોલ્ડ માર્કેટમાં રાજકોટ ફોકસ રહ્યું છે.