ઈલેક્શનમાં કરો સિલેક્શનઃ પહેલાં મતદાન પછી જળપાન

લોકસભા ૨૦૨૪ની ચૂંટણીનાં પડઘમ ચારેકોર વાગી રહ્યાં છે ત્યારે મહિલાઓનાં કેટલાંક કિટી પાર્ટી ગ્રુપ પણ અત્યારે હાઉઝી કે બીજી ગેમ સુધી સીમિત ન રહેતાં, શહેરની શેરીઓમાં અને ગામની ગલીઓમાં ‘મત આપો અને મત અપાવો’નો વિચાર ફેલાવી રહ્યાં છે.

- હેતલ રાવ

દેશમાં સૌથી મોટો ઉત્સવ ચાલી રહ્યો છે. આ પર્વ એટલે લોકસભાની ચૂંટણી. હા, આપણે ત્યાં ચૂંટણી પણ તહેવારની જેમ જ ઊજવવામાં આવે છે. મહિનાઓ અગાઉ રાજકીય પક્ષોની સાથે સાથે નાની-મોટી અનેક વ્યક્તિ એની તૈયારીમાં વ્યસ્ત થઈ જાય છે.

અગાઉ રાજકારણમાં બહુ ઓછી સ્ત્રી સક્રિયપણે રસ લેતી. જે મહિલા રાજકારણમાં હતી એમાંથી પણ અમુક તો પિતા કે પતિના રાજકીય ઉત્તરાધિકારી તરીકે કામ કરતી. આપમેળે રાજકારણમાં ઝંપલાવતી સ્ત્રીઓની સંખ્યા ઝાઝી નહોતી. હવે એવું રહ્યું નથી. બીજાં ક્ષેત્રની જેમ રાજકારણમાં પણ હવે મહિલાઓનું પ્રમાણ વધી રહ્યું છે. હા, એટલું ખરું કે ચૂંટણીમાં ઉમેદવારની પસંદગી હજી એની વિનેબિલિટીના એટલે કે જીતવાની ક્ષમતાના આધારે થાય છે. મની પાવર કે મસલ પાવર મૅનેજ કરવામાં પુરુષના પ્રમાણમાં સ્ત્રી પાછળ પડી જાય છે એ કારણે રાજકીય પક્ષોના ઉમેદવારોમાં સ્ત્રીની સંખ્યા ૧૫-૨૦ ટકાથી વધારે હોતી નથી.

ખેર, એક વાત તો નક્કી છે કે ચૂંટણીમાં વળી મહિલાને શી ખબર પડે? એવું હવે રહ્યું નથી. મહિલાઓમાં મતદાનની ટકાવારી પણ ઉપર જઈ રહી છે. એટલું જ નહીં, સ્ત્રીઓ હવે જુદા જુદા પક્ષોના ઉમેદવાર, ચૂંટણીમાં એમને સ્પર્શતા મુદ્દા, વગેરે વિશે ચર્ચા પણ કરે છે.

કિટી પાર્ટી એટલે પંચાત કરતી સ્ત્રીઓની મીટિંગ એવું ઘણા હજી માને છે, પણ ના, સાવ એવું નથી. કેટલાંક કિટી ગ્રુપની મેમ્બર્સ કોઈ ને કોઈ રચનાત્મક પ્રવૃત્તિ પણ કરે છે. એવાં કેટલાંક કિટી ગ્રુપ સુદ્ધાં છે જેમાં ચૂંટણી ટાણે મતદાર જાગૃતિનું કામ થાય છે. અહીં વાત છે એવાં જ  મહિલા ગ્રુપ્સની.

લોકશાહી ઝિંદાબાદઃ અમદાવાદ હોય કે અંકલેશ્વર, કિટી ગ્રુપ હોય યા યોગ કેન્દ્ર,

લોકોની સામાન્ય વિચારશૈલી પ્રમાણે મહિલા એટલે ઘર સંભાળનારી ગૃહિણી, બાળકોનો સારો ઉછેર કરનારી માતા અને એથી પણ વધુ આજના યુગમાં પતિને ઘરવ્યવહારમાં મદદ કરવા માટે નોકરી કરતી સ્વનિર્ભર સ્ત્રી. જો કે ચૂંટણી આવે ત્યારે ઘરના વડીલ પુરુષ કહે એમ અને કહે તો જ મતદાન કરવા જતી અબોલ નારી પણ ખરી. અલબત્ત, હવે આ સ્થિતિ બદલાઈ છે. હવે તો પડદા પાછળ રહીને ઘર, ઑફિસ સંભાળતી મહિલાઓ ચૂંટણીમાં પણ પોતાની ખાસ ભૂમિકા નિભાવે છે. ટિકિટ આપવામાં રાજકીય પક્ષ ભલેને મહિલાઓ સાથે અન્યાય કરે!