દસ લાખ આપો...નીટમાં સફળ થાવ!

હવે ગેરરીતિમાં પણ ગૅરન્ટી? ચકચારી એક્ઝામ ફ્રૉડના ગોધરા કનેક્શને ગુજરાત સરકાર અને રાજ્યની પોલીસને દોડતી કરી દીધી. અનેક ધરપકડો પછી હવે સીબીઆઈએ તપાસ સંભાળી છે.

- મહેશ શાહ (અમદાવાદ)

૨૦૦૨માં ગોધરા સ્ટેશન નજીક અયોધ્યાથી આવી રહેલી સાબરમતી એક્સપ્રેસના કોચમાં કારસેવકોને જીવતા સળગાવી મૂકવાની આતંકી ઘટના પછી ગોધરાનું નામ ફરી એક વાર ચર્ચામાં છે. આ વખતે ગોધરાની જય જલારામ સ્કૂલ પણ શંકાના ઘેરામાં આવી. થયું એવું કે બિહારમાં નીટનું પેપર ફૂટ્યું ને ગોધરામાં પૈસા લઈને અમુક ઉમેદવારોના માર્ક્સ વધારવાનું તરકટ કરવામાં આવેલું. જો કે એ નિષ્ફળ બન્યું. થેન્ક્સ ટુ પંચમહાલ કલેક્ટર.

કલેક્ટરે જિલ્લા શિક્ષણાધિકારીને સમયસર સૂચના આપી હતી કે ગોધરાના નીટ એક્ઝામ સેન્ટરમાં કોઈ શિક્ષક દ્વારા ગેરરીતિ થવાની છે. તપાસ કરો.

પછી તો અધિકારીઓ ઍક્શનમાં આવ્યા. પાંચ મેએ બપોરે બે વાગે નીટની પરીક્ષા યોજાવાની હતી, પણ અધિકારીઓ સવારે સવા દસે જ પરવડી વિસ્તારના નીટ એક્ઝામ સેન્ટર જય જલારામ સ્કૂલમાં તપાસાર્થે ધસી ગયા.

આ ચકાસણીમાં એક શિક્ષકના ફોનમાંથી કેટલાક પરીક્ષાર્થીની માહિતી તથા અમુક શંકાસ્પદ સ્ક્રીન શૉટ મળ્યા. છેવટે ગેરરીતિનો આયોજનબદ્ધ ખેલ પાર પડે એ પહેલાં જ પૂરો થઈ ગયો.

જિલ્લા શિક્ષણાધિકારી કિરીટ પટેલની ફરિયાદના અનુસંધાનમાં નાયબ પોલીસ અધીક્ષક એન.વી. પટેલ અને ટીમે તપાસ હાથ ધરીને જય જલારામ સ્કૂલના ભૂતપૂર્વ શિક્ષક અને નીટ પરીક્ષા કેન્દ્રના ડેપ્યુટી સેન્ટર સુપરિન્ટેન્ડેન્ટ તુષાર ભટ્ટ, વચેટિયા મનાતા ગોધરાના આરિફ વોરા અને વિભોર આનંદ તથા શાળાના અંગ્રેજી માધ્યમના આચાર્ય અને પરીક્ષા કેન્દ્રના સિટી કો-ઑર્ડિનેટર પુરુષોત્તમ શર્મા, વડોદરાના એજ્યુકેશન કન્સલ્ટન્ટ પરશુરામ રૉય એમ પાંચ આરોપીની તબક્કાવાર ધરપકડ કરી. સાત લાખની રોકડ રકમ, ૨.૨૮ કરોડ રૂપિયાના ચેક, અમુક કોરા ચેક, સીસીટીવીનું ડીવીઆર, ફોન, પરીક્ષાર્થીની યાદી, દસ્તાવેજો, વગેરે જપ્ત કર્યાં.