કાવડયાત્રાનો વિવાદઃ કહીં પે નિગાહેં... કહીં પે નિશાના

ભાજપ નેતાગીરી સાથે હિસાબ સરભર કરવા યોગી આદિત્યનાથે કાવડયાત્રાના રસ્તે બેસતા લારી-ગલ્લાવાળાઓને એમનાં નામ લખવાનો આદેશ આપી કટ્ટર હિંદુઓને પોતાની તરફ ખેંચવાનો પ્રયાસ કર્યો છે.

- હીરેન મહેતા

લોકસભા ચૂંટણીનાં પરિણામ જાહેર થયાને બે મહિના થવા આવ્યા, પણ એને કારણે પેદા થયેલાં વમળ હજી શમ્યાં નથી.

દેશના સૌથી મોટા રાજ્ય ઉત્તર પ્રદેશમાં ભાજપે છેલ્લી ચૂંટણીના પ્રમાણમાં ઊજળા દેખાવની આશા રાખી હતી, પરંતુ એમાં તો ભાજપે રોવાનો વારો આવ્યો, કારણ કે ૨૦૧૯ની ૬૨ સામે આ વખતે ભાજપ અને એના સાથી પક્ષોને ૩૭ બેઠક જ મળી. અયોધ્યાનું રામમંદિર પણ ભાજપની નાવડીને ઉગારી ન શક્યું. આ પરાજયનો ઓળિયોઘોળિયો મુખ્ય મંત્રી યોગી આદિત્યનાથના માથે આવ્યો એટલે યોગી ગિન્નાયા છે. એ સાથે ઉત્તર પ્રદેશ ભાજપમાં ઘણા સમયથી ઊકળતા ચરુનો ભેદ પણ ખૂલ્યો છે.

હમણાં ઉત્તર પ્રદેશમાં કાવડયાત્રાના મુદ્દે જે વિવાદ જામ્યો એના મૂળમાં ભાજપનો આ આંતરિક વિખવાદ હોવાનું ખુલ્લેઆમ બોલાય છે. લોકસભા ચૂંટણીનાં પરિણામ આવ્યાં ત્યારથી યોગીના જ સહકારી અને નાયબ મુખ્ય પ્રધાન કેશવ પ્રસાદ મૌર્ય ભાજપની ગણતરી ઊંધી પાડવા માટે છાશવારે યોગી તરફ આંગળી ચીંધી રહ્યા છે. મોર્ય પોતે પછાત વર્ગના કદાવર નેતા છે, પણ અત્યારે એમનું વાછરડું બીજી કોઈ ખૂંટીએ બંધાઈને કૂદાકૂદ કરી રહ્યું છે. મૌર્યની ઊછળકૂદ પાછળ પક્ષના કોઈ વરિષ્ઠ નેતાનો જ હાથ હોવાનું ન સમજી શકે એવા કાચા તો યોગીજી છે નહીં. ભાજપનું મોવડીમંડળ યોગીને દૂર કરવા માગે છે એવી વાત પણ થોડા સમયથી હવામાં છે.

આ બધી સોગઠીને એકસાથે માત આપવા યોગીએ આ સપ્તાહે શરૂ થયેલી કાવડયાત્રાને હાથો બનાવી. ઉત્તર પ્રદેશ સહિતનાં રાજ્યોમાં આ યાત્રાનું બહુ મહત્ત્વ છે. શ્રાવણ મહિનામાં ગંગાજીનું પાણી લઈ જઈ કાવડિયા જુદાં જુદાં શંકરમંદિરે એ ચડાવે છે. આ એક મહિનામાં ચારેક કરોડ શ્રદ્ધાળુ હિંદુઓ ઉત્તર પ્રદેશના જુદા જુદા જિલ્લામાંથી પસાર થાય છે. યાત્રાના રસ્તે બેસીને સેંકડો લારી-ગલ્લાવાળા નાનો-મોટો ધંધો કરે છે. ઝાઝું અક્ષરજ્ઞાન ન ધરાવતા અને એને કારણે રોજગારીનો બીજો વિકલ્પ ન ધરાવતા અનેક મુસ્લિમ યુવાનો આ એક મહિનાની યાત્રા દરમિયાન ખાણી-પીણીના બાંકડા લગાવી પૈસા રળે છે.