સૌંદર્યના વ્યવસાય સાથે અનેક મહિલાનાં જીવનની નવરચના

પિતાની ઈચ્છા હતી કે એ ડૉક્ટર બને, પરંતુ એને તો સ્ત્રીઓને પગભર કરવા માટે કામ કરવું હતું. હાથની રેખા એને લગ્ન પછી દુબઈ લઈ ગઈ. પછી એ જ હાથે હજારો યુવતીઓને મેંદી મૂકી એણે પોતાનું તકદીર લખ્યું અને બીજી મહિલાઓને પણ એ કામ શીખવી કમાણી કરતાં શીખવ્યું. એમની આ મહેનતનો રંગ ક્યારેય નહીં ઊતરે.

- હેતલ રાવ

મોટા થયા પછી કોઈ એમ પૂછે કે બાળપણની કઈ યાદ તમને ખૂબ સારી લાગે? તો સામાન્ય રીતે શાળાના દિવસો માનસપટ પર અંકિત થયા હોય એ યાદ આવે. જો કે ૬૭ વર્ષનાં કોઈ મહિલા કહે કે મને તો હું ત્રણ વર્ષની હતી ત્યારની પણ ઘણી પળ અને ઘટના યાદ છે, તો?

તો ચોક્કસ નવાઈ લાગે જ!

મૂળ જૂનાગઢ જિલ્લાના કેશોદ તાલુકાના સાવ નાનાએવા અવાણિયા ગામમાં જન્મેલાં અને અત્યારે દુબઈ શારજાહથી માંડી કુવૈતમાં ૧૫ મેંદી-બ્યુટી સલૂન ધરાવતાં રચના ઠક્કરની કહાની કંઈક જુદી જ છે. નાની ઉંમરે સાવ નજીકથી સમાજમાં આસપાસની સ્ત્રીઓ પર થતા અત્યાચાર જોનારી એ દીકરીએ નક્કી કરી લીધું હતું કે હું મોટી થઈને મહિલાઓને પગભર અને સુરક્ષિત કરવાનું કામ કરીશ. એક મેંદી આર્ટિસ્ટ તરીકે એમની આશરે સાડા ચાર દાયકાની સફરે આ વાતને સાર્થક પણ કરી.