બૅન્ક ધિરાણ સુવિધા હવે આવશે આંગળીનાં ટેરવે

‘યુપીઆઈ’ને ગ્લોબલ સ્તરે વ્યાપક બનાવવાના લક્ષ્ય બાદ બૅન્કિંગ જગતમાં ‘યુએલઆઈ” નામે ક્રાંતિના શ્રીગણેશ થશે.

- જયેશ ચિતલિયા

યુનિફાઈડ પેમેન્ટ ઈન્ટરફેસ (યુપીઆઈ)ની જબરદસ્ત સફળતા બાદ રિઝર્વ બૅન્ક ઑફ ઈન્ડિયાએ એને ગ્લોબલ સ્તરે વ્યાપક-સ્વીકાર્ય બનાવવાનું લક્ષ્ય ઘડ્યું છે. બીજી બાજુ, યુનિફાઈડ લૅન્ડિંગ ઈન્ટરફેસ (યુએલઆઈ)ને રાષ્ટ્રીય સ્તરે ફેલાવી દેવાનું મહત્ત્વાકાંક્ષી ધ્યેય રાખીને રિઝર્વ બૅન્ક આગળ વધી રહી છે. વેપાર-ઉદ્યોગજગત માટે આ બન્ને ક્રાંતિકારી પરિવર્તન છે.

સૌપ્રથમ યુપીઆઈની વાત કરીએ... હવે રિઝર્વ બૅન્ક ભારતીય રૂપે કાર્ડ અને યુપીઆઈ (યુનિફાઈડ પેમેન્ટ ઈન્ટરફેસ)ને ગ્લોબલ સ્તરે લઈ જવા માગે છે. રિઝર્વ બૅન્કના ગવર્નર શક્તિકાંત દાસે માત્ર આનો સંકેત જ નથી આપ્યો, પણ અમુક અંશે એની રૂપરેખા પણ આપી છે એટલે આ વિચારને આકાર પામતાં હવે બહુ સમય નહીં લાગે એવું કહી શકાય. આ પ્રયોગ રિઝર્વ બૅન્ક કમ સે કમ ચોક્કસ દેશોમાં હાથ ધરી લીધો છે, જેમાં ભુતાન, નેપાળ, શ્રીલંકા, પેરુ, સિંગાપોર અને યુએઈ (યુનાઈટેડ આરબ એમિરેટ્સ)નો સમાવેશ થાય છે.

ક્રૉસ બોર્ડર પેમેન્ટ વ્યવહાર