આ લોકોને રોકાણકાર કહેવાય?

આઈપીઓ છલકાવાની સફળતા બાદની કરુણતા

- જયેશ ચિતલિયા

આઈપીઓ છલકાવાની સફળતા બાદની કરુણતા

લિસ્ટિંગના પ્રથમ સપ્તાહમાં જ શૅર્સ વેચી બજારની બહાર! ડેરિવેટિવ્ઝ અને ઈન્ટ્રા-ડે ટ્રેડિંગ કરતા રોકાણકારોને ચેતવણી આપ્યા બાદ ‘સેબી’એ હમણાં વધુ એક આંચકાજનક અભ્યાસ દ્વારા આઈપીઓના ઈન્વેસ્ટર્સને પણ સ્પષ્ટ સંકેત આપ્યો છે. આ સંકેતની ગંભીરતા સમજવી જરૂરી છે.

ભારતીય કૅપિટલ માર્કેટ હજી કેટલું અપરિપક્વ છે એવી પ્રતીતિ સેબીનો અભ્યાસ કરાવે છે, જેમાં રોકાણકારોની ઝટપટ કમાઈ લેવાની માનસિકતા પણ સતત પ્રગટ થાય છે.

ફ્યુચર્સ ઑપ્શન્સ (ડેરિવેટિવ્ઝ) ટ્રેડિંગમાં દરેક દસમાંથી નવ રોકાણકાર નુકસાન કરે છે તો ઈન્ટ્રાડે ટ્રેડિંગમાં રોકાણ કરનારા દરેક દસમાંથી સાત જણા ખોટ ભોગવે છે. એવા અભ્યાસ બાદ નિયમનતંત્ર સેબી (સિક્યોરિટીઝ ઍન્ડ એક્સચેન્જ બોર્ડ ઑફ ઈન્ડિયા)એ વધુ એક ચોંકાવનારો અહેવાલ બહાર પાડ્યો છે. આ અભ્યાસ મુજબ, આઈપીઓમાં શૅર્સ મેળવનાર પચાસ ટકાથી વધુ રોકાણકારો લિસ્ટિંગના એક જ સપ્તાહમાં શૅર વેચી નીકળી જાય છે. આઈપીઓમાંથી આ બહાર નીકળી જતું રોકાણ એના મૂલ્યની દૃષ્ટિએ ૭૦ ટકા સુધી પહોંચી ગયું છે.