ટુડોનો આવો તે કેવો ભારતદ્વેષ!

શીખ આગેવાનના ટેકે ચાલતી પોતાની સરકાર બચાવવા કેનેડાના વડા પ્રધાન એમના દેશમાં ચાલતાં ભારતવિરોધી કારનામાં ચલાવી લે. એટલું જ નહીં, આંતરિક રાજનીતિમાં ભારત સામે હસ્તક્ષેપનું આળ મૂકે અને ભારતીય અધિકારીઓ સામે બેફામ આક્ષેપો કરે એ કેવું? ભારતે પણ હવે જો કે ‘જેવા સાથે તેવા”ની નીતિ અપનાવી છે.

- હીરેન મહેતા

સામાન્ય રીતે રાજદ્વારી સ્તરે ભારત તરફથી આવી ભાષાનો ઉપયોગ માત્ર પાકિસ્તાનની ઝાટકણી કાઢવા માટે કરવામાં આવે છે. જો કે હમણાં હમણાં કેનેડાનો ભારતદ્વેષ એટલો વધી ગયો છે કે એને વાત વાતમાં ભારત સાથે વાંકું પડે છે અને સ્થાનિક રાજકારણમાં પણ કેનેડા મોકો મળે ત્યાં ભારતનું નામ વગોવે છે. આ જ કારણે ભારતે હમણાં અતિ ઉગ્ર શબ્દોમાં કેનેડાને ઠપકાર્યું છે.