ફૂલના ગરબા, બાધા-માનતાના ગરબા, હરખના ગરબા...

નવરાત્રિમાં તો બધે ગરબા રમાય, પરંતુ ઉત્તર ગુજરાતનાં ઘણાં ગામમાં તો છેક કાળી ચૌદશ અને દિવાળી સુધી કે ક્યાંક તો ખાસ એ બે રાત્રે જ ગરબા થાય, એ પણ કાગળ કે પ્લાસ્ટિકનાં ફૂલના, ખાસ્સા વજનદાર ગરબા. એ માથે લઈને ગામની સ્ત્રીઓને ગરબે રમતી જોવી એ પણ એક લહાવો છે.

- શૈલેષ નાયક (અમદાવાદ)

રમતો ભમતો જાય, આજ માનો ગરબો રમતો જાય...

માને પાંચ તે ગરબા મનગમતા મારી સૈયરું રે, કિયા માડી ગરબે ઘૂમી જાય, હાલો જોવા જઈએ રે...

માએ ગરબો કોરાવ્યો ગગન ગોખમાં રે...

આદ્યશક્તિ જગતજનનીની ભક્તિનો અવાજ ગુંજતો થાય કે ગામના ચોકમાં સ્ત્રીઓ સાડા ચારથી સાડા પાંચ ફૂટ ઊંચા સુશોભિત ગરબા માથે મૂકે. આપણને થાય કે આટલા ઊંચા તે કંઈ ગરબા હોય? પણ હા, આ ગરબા જરા અલગ છે અને હા, એની સાથે દીવાની જ્યોત ઝળહળતી હોય એવો માટીનો ગરબો પણ હોય જ. આ ગરબા માથે લઈને નારીશક્તિ ઘમ્મર ઘમ્મર ગરબે ઘૂમતી હોય ત્યારે નોખો જ નજારો સર્જાય.

નવરાત્રિ પછીના દિવસોમાં તમે ઉત્તર ગુજરાતમાં મહેસાણા, પાટણ, વિસનગર, વડનગર, ખેરાલુ, ઊંઝા, માણસા, ગાંધીનગર પંથકનાં ગામોમાં જશો તો રાત્રે મોટા ભાગનાં ગામોના ચોકમાં આ રીતે ગરબે ઘૂમતા લોકો જોવા મળશે. સ્વાભાવિક રીતે વિચાર આવે કે નવરાત્રિ પૂરી થઈ ગઈ પછી પણ અહીં કેમ ગરબા રમાય છે?

તો જાણી લો કે ઉત્તર ગુજરાતનાં ઘણાં ગામોમાં નવરાત્રિ બાદ પણ ગરબાની રંગત જામે છે અને આ ગરબા રમાય છે એ માનતાના ફૂલના ગરબા તરીકે ઓળખાય છે.