જીવનની સમી સાંજે સંબંધ વિખેરાય ત્યારે...

મોટી ઉંમરે લેવાતા છૂટાછેડામાં પુખ્ત વયનાં સંતાનોની ભૂમિકા કેવી હોય છે?

- કેતન મિસ્ત્રી (મુંબઈ)

હિદી સિનેમા-ઓટીટીના પ્રતિભાશાળી અભિનેતા અને સોશિયલ મિડિયામાં ફડ બ્લોગર તથા સ્ટૅન્ડ-અપ કૉમેડિયન તરીકે સક્રિય એવા આશિષ વિદ્યાર્થીએ થોડા મહિના પહેલાં ૬૦ વર્ષની વયે આસામની રૂપાલી બરુઆ સાથે લગ્ન કર્યાં. લગ્ન બાદ આશિષે કહ્યું: ‘જીવનના આ તબક્કે (૬૦ વર્ષે) લગ્ન કરી રહ્યો છું ત્યારે મનમાં ન સમજાય એવી લાગણી અનુભવી રહ્યો છું.’ ૧૧થી વધુ ભાષાની ફિલ્મોમાં કામ કરનારા આશિષનાં આ બીજાં લગ્ન છે. પહેલાં લગ્ન અભિનેત્રી રાજોશી વિદ્યાર્થી સાથે થયાં હતાં. દંપતીને ૨૪ વર્ષનો પુત્ર અર્થ વિદ્યાર્થી છે. રાજોશી પણ ફિલ્મ-નાટ્યઅભિનેત્રી–ગાયિકા છે. આશિષે લગ્નની જાહેરાત કરી ત્યારે ઈન્ટરનેટ પર એની ખાસ્સી ચર્ચા ચાલી. કોઈએ એવું લખી નાખ્યું કે આ તો ગ્રે મૅરેજ કહેવાય.

જી હા, સોશિયલ મિડિયા અને એની પર મૂકવામાં આવતા ફોટાના રંગીન ફિલ્ટરના યુગમાં હવે લગ્ન તથા છૂટાછેડામાં પણ રંગ ભળ્યો છે. મૅરેજ-ડિવોર્સ હવે બ્લૅક ઍન્ડ વ્હાઈટ જ નહીં, પરંતુ ગ્રે પણ હોય છે. ગ્રે ડિવોર્સ અર્થાત્ વાળ ધોળા થવાની ઉંમરે લેવાતા છૂટાછેડા. અમેરિકામાં થયેલા એક તાજા સર્વેક્ષણ મુજબ છેલ્લાં વીસ વર્ષ દરમિયાન ડોનાલ્ડ ટ્રમ્પના દેશમાં થયેલા ડિવોર્સમાં ૪૦ ટકા તો પચાસ વર્ષ કે એથી મોટી ઉંમરનાં સ્ત્રી-પુરુષોએ લીધેલા છૂટાછેડા છે. ભારતમાં ગ્રે ડિવોર્સ કેટલા થાય છે એના તો કોઈ આંકડા નથી, પણ સરકારી આંકડા મુજબ, આપણે ત્યાં ૧૦૦માંથી એક લગ્ન છૂટાછેડામાં પરિણમે છે.