ജീവന്റെ രഹസ്യം തേടി ഡാർവിന്റെ ഗവേഷണയാത്രകൾ

ജീവിവർഗങ്ങളുടെ പരിണാമസിദ്ധാന്തം ശാസ്ത്രലോകത്തെ വിലപിടിപ്പുള്ള കണ്ടുപിടിത്തങ്ങളിലൊന്നാണ്. ചാൾസ് ഡാർവിൻ നടത്തിയ സാഹസികയാത്രകളും വർഷങ്ങൾ നീണ്ട ഗവേഷണങ്ങളുമാണ് ഈ നേട്ടത്തിലേക്ക് നയിച്ചത്. ഹൈസ്കൂൾ ക്ലാസുകളിലെ ജീവശാസ്ത്ര പാഠപുസ്തകത്തിലെ പ്രധാന പാഠഭാഗങ്ങളിലൊന്നായ പരിണാമത്തെക്കുറിച്ച് വിശദമായി മനസ്സിലാക്കാൻ ഈ ലേഖനം സഹായിക്കും

- റിജി വിജയൻ

ആധുനിക ജീവ ശാസ്ത്രത്തിന്റെ മൂലകല്ലായ  പരിണാമ സിദ്ധാന്തത്തിന്റെ ഉപജ്ഞാതാവ് ചാൾസ് റോബർ ഡാർവിൻ 1809 ഫെബ്രുവരി 12-ന് ഇംഗ്ലണ്ടിലെ ഷൂസ്റിയിൽ ആണ് ജനിച്ചത്. അച്ഛൻ റോബർട്ട് ഡാർവിൻ ഡോക്ടറായിരുന്നു. അമ്മ സൂസന്ന ഡാർവിൻ. റോബർട്ട് ഡാർവിന്റെ പിതാവ് ഇറാസ്മസ് ഡാർവിൻ ഡോക്ടറും ജീവശാസ്ത്രജ്ഞനും ചിന്തകനുമായിരുന്നു. ലൂണാർ സൊസൈറ്റി എന്ന പ്രശസ്തമായ ബുദ്ധിജീവി സദസ്സിന്റെ സ്ഥാപകനുമായിരു ന്നു അദ്ദേഹം. കാവ്യരൂപത്തിലുള്ള ശാസ്ത്രലേഖനങ്ങളിലൂടെ പ്രസിദ്ധനായ ഇറാസ്മസ് ഡാർവിൻ, ജീവികളിലെ മാറ്റങ്ങൾക്ക് കാരണം പരിസ്ഥിതിയുടെ സ്വാധീനമാണെന്ന ആശയം അവതരിപ്പിച്ചു. ഇറാസ്മസിന്റെ ആദ്യ ഭാര്യയിലെ മകനായിരുന്നു ചാൾസിന്റെ പിതാവായ റോബർട്ട് ഡാർവിൻ. രണ്ടാമത്തെ ഭാര്യയിലുണ്ടായ മകനാണ് വിഖ്യാതനായ നരവംശ ശാസ്ത്രജ്ഞനും പര്യവേക്ഷകനുമായ സർ ഫ്രാൻസിസ് ഗാൽറ്റൺ. ചാൾസിന്റെ എട്ടാം വയസ്സിൽ, 1817-ൽ പെരിറ്റോണൈറ്റിസ് രോഗബാധയാൽ അമ്മ സൂസന്ന മരിച്ചു.

പ്രകൃതിസ്നേഹിയായ റോബർട്ട് ശേഖരിച്ചുവെച്ച പലതരം കൗതുകവസ്തുക്കൾ ചാൾസിൽ പ്രകൃതി ചരിത്രം, ജീവശാസ്ത്രം തുടങ്ങിയ വിഷയങ്ങളിൽ അഗാധമായ താത്പര്യം ജനിപ്പിച്ചു. ജീവശാസ്ത്രപരമായ മാതൃകകൾ ശേഖരിക്കുന്നതിൽ ചാൾസ് ഉത്സാഹം കാട്ടി. കളിച്ചും ചിരിച്ചും നിരീക്ഷിച്ചും പഠിച്ചും തന്റെ ബാല്യകാലം ചാൾസ് ചെലവഴിച്ചു. എങ്കിലും അമ്മയുടെ വേർപാട് ആ കുഞ്ഞുമനസ്സിനെ ഏറെ സ്വാധീനിച്ചിരുന്നു. ജീവികളെ നിരീക്ഷിക്കുക, മാതൃകകൾ ശേഖരിക്കുക, അവയുടെ കാറ്റലോഗ് തയ്യാറാക്കുക, ജീവജാതി നിർണയം നടത്തുക തുടങ്ങിയവ അദ്ദേഹത്തിന്റെ ഇഷ്ട വിനോദങ്ളായിരുന്നു. മറ്റുള്ളവരോട് അനുകമ്പയുള്ള ഒരു കുട്ടിയുമായിരുന്നു ചാൾസ്. സ്കൂൾ പഠനകാലത്ത് പ്രത്യേകിച്ച് ഒരു മേഖലയിലും തിളങ്ങുന്നതിന് അദ്ദേഹത്തിന് സാധിച്ചില്ല. അതുകൊണ്ടുതന്നെ അച്ഛനും അധ്യാപകരും ചാൾസിനെ സാമർഥ്യമില്ലാത്ത ഒരു സാധാരണ ബാലനായി മാത്രം കരുതി. പിന്നീട് യൗവനകാലത്തിൽ അന്നത്തെക്കാലത്തെ ചെറുപ്പക്കാരുടെ വിനോദമായിരുന്ന നായാട്ടിലും തത്പരനായിരുന്നു. വെറും രസത്തിനു വേണ്ടി നൂറുകണക്കിന് പക്ഷികളെയും ചെറുമൃഗങ്ങളെയും വെടിവെച്ചിട്ടു. പിന്നീട് ഡാർവിൻ ഇതേക്കുറിച്ച് ഓർക്കുകയും, ദുഃഖത്തോടെ എഴുതുകയും ചെയ്തിരുന്നു.