അക്കമ്മ ചെറിയാൻ തിരുവിതാംകൂറിന്റെ ഝാൻസി റാണി

നവോത്ഥാന നായകർ 

- വി. രാധാകൃഷ്ണൻ

തോക്ക് ചൂണ്ടിനിന്ന ബ്രിട്ടീഷ് പട്ടാള മേധാവിക്ക് മുന്നിൽ അശേഷം കൂസാതെ ആ ഇരുപത്തൊൻപതുകാരി പറഞ്ഞു: “ആദ്യം എന്നെ വെടിവെച്ചുവീഴ്ത്തൂ... എന്നിട്ടാകാം മറ്റുള്ളവരെ...

1938 ഒക്ടോബർ 23 - ന് തിരുവിതാം കൂറിൽ ഉത്തരവാദ പ്രക്ഷോഭത്തിന്റെ ഭാഗമായി ജാഥ നയിക്കവെ അപ്രകാരം പറഞ്ഞ യുവതിയാണ് അക്കമ്മ ചെറിയാൻ. ഗാന്ധിജിയുടെ ഭാഷയിൽ “തിരുവിതാംകൂറിന്റെ ഝാൻസി റാണി.

മഹാരാജാവിന്റെ ജന്മദിനമായിരുന്നു അന്ന്. തടവിൽ കഴിയുന്ന ജനനേതാക്കളെ മോചിപ്പിക്കുക, ഉത്തരവാദ ഭരണം അനുവദിക്കുക തുടങ്ങിയ ആവശ്യങ്ങൾ ഉന്നയിച്ച് രാജധാനിയിലേക്ക് നീങ്ങിയ ഇരുപതിനായിരത്തോളം സന്നദ്ധ ഭടന്മാർ അണിനിരന്ന ജാഥയെയാണ് അക്കമ്മ നയിച്ചത്. ജാഥ കോട്ടവാതിലിന് പുറത്തെത്തിയപ്പോൾ കേണൽ വാട്സൺ എന്ന ബ്രിട്ടീഷ് പട്ടാളമേധാവിയുടെ നേതൃത്വത്തിലുള്ള കുതിരപ്പട്ടാളം തടയാനെത്തി. കുത്തിയിരുന്ന ജാഥാംഗങ്ങളെ ചവിട്ടിമെതിച്ചു കൊണ്ട് കുതിരകൾ പാഞ്ഞു. ക്രൂരമായ മർദനം നടന്നു. പിരിഞ്ഞു പോകാത്ത പക്ഷം വെടിവയ്ക്കുമെന്ന് പട്ടാളമേധാവി ആക്രോശിച്ചപ്പോൾ അമ്മ ആവർത്തിച്ചു: “ഞാനാണ് ജാഥ നയിക്കുന്നത്. ആദ്യം എന്റെ നെഞ്ചിൽ നിറയൊഴിക്കുക.