தன்கருக்கு எதிராக தீர்மானம் மாஜி பிரதமர் தேவகவுடா பேச்சால் கடும் அமளி

மாநிலங்களவை நாள் முழுவதும் ஒத்திவைப்பு

துணை ஜனாதிபதி தன்கருக்கு எதிராக கொண்டு வரப்பட்ட நம்பிக்கையில்லா தீர்மானம் தொடர்பாக தேவகவுடா பேச்சால் மாநிலங்களவையில் கடும் அமளி ஏற்பட்டது. இதனால் அவை நாள் முழுவதும் ஒத்திவைக்கப்பட்டது. நாடாளுமன்ற குளிர் கால கூட்டத்தொடர் தொடங்கியது முதல் இருஅவைகளும் அமளியால் முடங்கி வருகின்றன. முதலில் அமெரிக்கா நீதிமன்றத்தில் அதானி மீதான குற்றச்சாட்டு, அதை தொடர்ந்து அமெரிக்க தொழில் அதிபர் ஜார்ஜ் சோரஸ் மற்றும் காங்கிரஸ் தொடர்பு குறித்த புகார், தற்போது துணை ஜனாதிபதி ஜெகதீப் தன்கரை பதவி நீக்கம் செய்ய கொண்டு வரப்பட்ட நம்பிக்கையில்லா தீர்மானம் காரணமாக அவைகள் முடங்கி வருகின்றன.

நேற்று காலை மாநிலங்களவை கூடியதும் அவை நடவடிக்கை தொடர்பாக வழங்கப்பட்ட 5 நோட்டீஸ்களை அவைத்தலைவர் தன்கர் நிராகரித்தார். மேலும் அலகாபாத் உயர்நீதிமன்ற நீதிபதியின் அவமதிப்பு பேச்சு தொடர்பாக காங்கிரஸ் எம்பி ரேணுகா சவுத்ரி அளித்த ஆறாவது நோட்டீசும் நிராகரிக்கப்படுவதாகவும் தன்கர் கூறினார். அதைத்தொடர்ந்து பேசிய அவை முன்னவர் ஜே.பி. நட்டா, செய்தியாளர் கூட்டத்தில் தன்கரை விமர்சித்த காங்கிரஸ் தலைவர் மல்லிகார்ஜுன கார்கேவை கடுமையாகக் கண்டித்தார்.

மேலும்,’அமெரிக்க தொழில் அதிபர் ஜார்ஜ் சோரசுக்கும், சோனியா காந்திக்கும் என்ன தொடர்பு? நாடு தெரிந்துகொள்ள விரும்புகிறது’ என்றார். இதனால் அவையில் கடும் அமளி ஏற்பட்டது. அப்போது சோனியா காந்தியும் அவையில் இருந்தார். நட்டாவின் கருத்துகளுக்கு பதிலளிக்க கார்கேவுக்கு தன்கர் அனுமதி அளித்தார். ஆனால் பா.ஜ எம்பிக்கள் அமளி நீடித்ததால் அவையை நடத்த முடியவில்லை. இதனால் அவை அடுத்தடுத்து ஒத்திவைக்கப்பட்டது.