உக்ரைன் துறைமுகத்தில் ரஷியா மீண்டும் தாக்குதல்

உக்ரைன் தானியங்களை ஏற்றுமதி செய்வதற்குப் பயன்படுத்தப்படும் அந்த நாட்டுத் துறைமுகம் மீது ரஷியா மீண்டும் ஏவுகணைத் தாக்குதல் நடத்தியது.

இது குறித்து அதிகாரிகள் திங்கள்கிழமை கூறியதாவது:

கருங்கடல் பகுதியில் அமைந்துள்ள ஒடெஸா நகருக்கு அருகிலுள்ள துறைமுகத்தின் மீது ஆளில்லா விமான குண்டுகள், ஏவுகணைகளை வீசி ரஷியா ஞாயிற்றுக்கிழமை நள்ளிரவு தாக்குதல் நடத்தியது.

அந்த ஏவுகணைகளையும், ஆளில்லா விமானங்களையும் உக்ரைனின் வான்பாதுகாப்பு ஏவுகணைகள் இடைமறித்து அழித்தன.

இருந்தாலும், வீசப்பட்ட 12 ‘காலிபா்’ ரக ஏவுகணைகளில் ஒன்றும், இரண்டு பி-800 ஓனிக்ஸ் ரக ஏவுகணைகளும் வான்பாதுகாப்பு ஏவுகணைகளிடம் சிக்காமல் இலக்குகளைத் தாக்கின.

இதில் துறைமுகத்தின் கட்டமைப்புகள் சேதமடைந்தன. ஒரு தானியக் கிடங்கும் நாசமானது. அத்துடன், கைவிடப்பட்ட ஹோட்டல் கட்டடம் ஒன்றும் சேதமடைந்தது என்று அதிகாரிகள் கூறினா்.