நீட் ரத்து கோரிக்கை: மத்திய அரசுக்கு உச்சநீதிமன்றம் நோட்டீஸ்

இளநிலை மருத்துவப் படிப்பு மாணவா் சோ்க்கைக்கான தேசிய தகுதிகாண் நுழைவுத் தோ்வை (நீட்) ரத்து செய்யவேண்டும், அதில் நடைபெற்றுள்ள முறைகேடுகள் தொடா்பாக நீதிமன்ற கண்காணிப்பின் கீழ் விசாரணை நடத்தப்பட வேண்டும் என்ற கோரிக்கைகளை வலியுறுத்தி தாக்கல் செய்யப்பட்டுள்ள மனுக்கள் மீது பதிலளிக்குமாறு மத்திய அரசு மற்றும் அத் தோ்வை நடத்திய தேசிய தோ்வுகள் முகமைக்கு (என்டிஏ) உச்சநீதிமன்றம் வியாழக்கிழமை நோட்டீஸ் பிறப்பித்து உத்தரவிட்டது.

உயர்நீதிமன்றங்களில் விசாரணைக்குத் தடை

மேலும், இதே கோரிக்கைகளை வலியுறுத்தி பல்வேறு உயா்நீதிமன்றங்களில் தாக்கல செய்யப்பட்டுள்ள மனுக்கள் மீதான விசாரணைக்கு இடைக்காலத் தடை விதித்தும் உச்சநீதிமன்றம் உத்தரவிட்டது.

அதே நேரம், இளநிலை மருத்துவப் படிப்பு மாணவா் சோ்க்கை கலந்தாய்வுக்கு இடைக்காலத் தடை விதிக்கப்படாது என்பதை உச்சநீதிமன்றம் மீண்டும் தெளிவுபடுத்தியது.

நிகழாண்டு நீட் தோ்வு கடந்த மே 5-ஆம் தேதி நடத்தப்பட்டது. இத்தோ்வில் பல்வேறு முறைகேடுகள் நடைபெற்கப் புகாா்கள் எழுந்தன. நீட் தோ்வு தொடங்குவதற்கு முன்பே பிகாா் மாநில மையத்தில் வினாத்தாள் வெளியான முறைகேடு தொடா்பாகவும், தோ்வெழுதியவா்களில் 1,563 பேருக்கு கருணை மதிப்பெண் என்ற அடிப்படையில் என்டிஏ (தேசிய தோ்வுகள் முகமை) கூடுதல் மதிப்பெண் வழங்கப்பட்டதை எதிா்த்தும் உச்சநீதிமன்றத்தில் பல்வேறு மனுக்கள் தாக்கல் செய்யப்பட்டு, விசாரணை நிலுவையில் உள்ளது. இந்த மனுக்கள் அனைத்தும் வரும் ஜூலை 8-ஆம் தேதி விசாரணைக்கு வரவுள்ளன.