ரூ. 100 கோடி நில அபகரிப்பு வழக்கு - முன்னாள் அமைச்சர் எம்.ஆர்.விஜயபாஸ்கர் வீடு உள்பட 8 இடங்களில் சிபிசிஐடி சோதனை

ரூ.100 கோடி நில அபகரிப்பு வழக்கு தொடர்பாக முன்னாள் அமைச்சர் எம்.ஆர்.விஜயபாஸ்கரின் வீடு உள்பட 8 இடங்களில் சிபிசிஐடி அதிகாரிகள் ஞாயிற்றுக்கிழமை சோதனை செய்தனர்.

முன்னாள் அமைச்சர் எம்.ஆர். விஜயபாஸ்கர், அவரின் சகோதரர் சேகர் உள்பட 3 பேர் சேர்ந்து, தனது ரூ.100 கோடி மதிப்பிலான 22 ஏக்கர் நிலத்தை போலி பத்திரம் தயாரித்து அபகரித்துவிட்டதாக கரூரை அடுத்த வாங்கல் குப்புச்சிபாளையத்தைச் சேர்ந்த பிரகாஷ் என்பவர் கரூர் நகர காவல் நிலையத்தில் புகார் செய்தார்.

அதன்பேரில் போலீஸார் வழக்குப் பதிந்து விசாரணையை தீவிரப் படுத்தினர்.

இந்த வழக்கில் முன்ஜாமீன் கோரி எம்.ஆர்.விஜயபாஸ்கர், சேகர் ஆகியோர் கரூர் மாவட்ட அமர்வு நீதிமன்றத்தில் மனுதாக்கல் செய்தனர்.

இதற்கிடையே வழக்கின் விசாரணையை சிபிசிஐடிக்கு மாற்றி தமிழக காவல் துறை தலைமை இயக்குநர் சங்கர் ஜிவால் உத்தரவிட்டார்.