நாடாளுமன்றக் குழு பரிசீலனைக்கு வக்ஃப் வாரிய சட்டத் திருத்த மசோதா- எதிர்க்கட்சிகள் வலியுறுத்தல்

மக்களவையில் வியாழக்கிழமை (ஆக. 8) அறிமுகப்படுத்தப்பட உள்ள வக்ஃப் வாரிய சட்டத் திருத்த மசோதாவை நாடாளுமன்ற நிலைக் குழு பரிசீலனைக்கு அனுப்ப வேண்டும்’ என்று எதிர்க்கட்சிகள் புதன்கிழமை வலியுறுத்தின.

மக்களவை அறிமுகத்துக்கு முன்பாக, அந்த மசோதாவின் நகல் அவை உறுப்பினர்களுக்கு செவ்வாய்க்கிழமை இரவு அனுப்பப்பட்டது.

இந்த மசோதாவின்படி, வக்ஃப் வாரிய சொத்து குறித்து தீர்மானிக்கும் வாரியத்தின் அதிகாரம் தொடர்பாக தற்போதைய சட்டத்தில் (வக்ஃப் வாரிய சட்டம் 1995) இடம்பெற்றுள்ள பிரிவு 40 நீக்கம் செய்யப்பட்டுள்ளது. அதற்கு மாறாக, மத்திய வக்ஃப் கவுன்சில் மற்றும் மாநில வக்ஃப் வாரிய உறுப்பினர்களும் இடம்பெறும் தொகுப்பு அமைப்பாக மாற்றப்படுவதோடு, முஸ்லிம் பெண்கள் மற்றும் முஸ்லிம் அல்லாதவர்களும் வக்ஃப் வாரியங்களில் இடம்பெறுவதை மசோதா உறுதி செய்கிறது.