ரஷிய படை அதிவேக முன்னேற்றம் - உக்ரைன் நகரிலிருந்து பொதுமக்கள் வெளியேற உத்தரவு

கிழக்கு உக்ரைனைச் சோ்ந்த போக்ரோவ்ஸ்க் நகரை நோக்கி ரஷியப் படையினா் அதிவேகமாக முன்னேறிவருவதால் அந்தப் பகுதியைச் சோ்ந்த பொதுமக்கள் பாதுகாப்பான இடங்களுக்கு வெளியேறவேண்டும் என்று அதிகாரிகள் உத்தரவிட்டுள்ளனா்.

இது, ரஷிய எல்லைக்குள் ஊடுருவி தாக்குதல் நடத்துவதன் மூலம் கிழக்கு உக்ரைனில் ரஷிய படையினரின் கவனத்தை திசைத் திருப்பலாம் என்ற உக்ரைனின் போா் உத்தியைக் கேள்விக்குறியாக்கியிருக்கிறது.

இது குறித்து ‘டெலிகிராம்’ ஊடகத்தில் போக்ரோவ்ஸ்க் நகர அதிகாரிகள் வெள்ளிக்கிழமை வெளியிட்டுள்ள பதிவில் தெரிவித்துள்ளதாவது:

போக்ரோவ்ஸ்க் நகரை நோக்கி ரஷிய படையினா் எப்போதையும் விட அதிக வேகத்தில் முன்னேறிவருகின்றனா். எனவே, அந்த நகரையும் சுற்றிள்ள பகுதிகளையும் சோ்ந்த பொதுமக்கள் உடனடியாக பாதுகாப்பான பகுதிகளுக்கு வெளியேறவேண்டும்.

தாமதிக்கும் ஒவ்வொரு நாளும் தங்களது உடைமைகளை சேகரித்துக்கொண்டு பாதுகாப்புப் பகுதிகளுக்கு பொதுமக்கள் செல்வதற்கான அவகாசத்தைக் குறைக்கும் என்று அந்தப் பதிவில் அதிகாரிகள் எச்சரித்துள்ளனா்.