டெல் அவிவ் நகரில் ஹிஸ்புல்லா ஏவுகணை வீச்சு

இஸ்ரேலின் டெல் அவிவ் நகரில் லெபனானின் ஹிஸ்புல்லா படையினா் புதன்கிழமை ஏவுகணை வீசினா்.

கடந்த 11 மாதங்களாக நடைபெற்று வரும் மோதலில் இஸ்ரேலுக்குள் இவ்வளவு தொலைவில் தாக்குதல் நடத்தப்படுவது இதுவே முதல்முறை என்பது குறிப்பிடத்தக்கது.

தரையிலிருந்து தரை இலக்குகளைத் தாக்கும் அந்த பலிஸ்டிக் வகை ஏவுகணை இஸ்ரேலின் வான்பாதுகாப்பு அமைப்பால் இடைமறித்து அழிக்கப்பட்டது.

இது குறித்து ஹிஸ்புல்லா ஆயுதக் குழுவினா் வெளியிட்டுள்ள அறிக்கையில் தெரிவிக்கப்பட்டுள்ளதாவது:

டெல் அவிவ் நகரிலுள்ள இஸ்ரேல் உளவு அமைப்பான மொஸாடின் தலைமையகத்தைக் குறிவைத்து புதன்கிழமை அதிகாலை ஏவுகணைத் தாக்குதல் நடத்தப்பட்டது. இந்தத் தாக்குதலுக்கு காதா் 1 ரக பலிஸ்டிக் ஏவுகணை பயன்படுத்தப்பட்டது.

லெபானில் ஹிஸ்புல்லா தளபதிகளைக் குறிவைத்து நடத்தப்பட்ட தாக்குதல்களுக்கும் கடந்த வாரம் நடத்தப்பட்ட பேஜா் தாக்குதலுக்கும் மொஸாட் அமைப்புதான் காரணம். எனவே, அந்த அமைப்பின் தலைமையகம் குறிவைக்கப்பட்டது என்று அந்த அறிக்கையில் தெரிவிக்கப்பட்டுள்ளது.

இஸ்ரேல் ராணுவம் வெளியிட்டுள்ள அறிக்கையில், ‘லெபானில் இருந்து வீசப்பட்ட ஏவுகணை டெல் அவிவ் நகரில் இடைமறித்து அழிக்கப்பட்டது. அந்த நாட்டிலிருந்து ஓா் ஏவுகணை இஸ்ரேலின் மையப் பகுதி வரை வந்தது இதுவே முதல்முறை’ என்று தெரிவிக்கப்பட்டுள்ளது. மொஸாட் தலைமையகத்தைக் குறிவைத்து ஏவுகணை வீசப்பட்டதாக ஹிஸ்புல்லாக்கள் கூறினாலும், அந்த ஏவுகணை பொதுமக்கள் வசிக்கும் பகுதியை நோக்கி சென்றுகொண்டிருந்ததாக இஸ்ரேல் ராணுவம் கூறியது. டெல் அவிவ் மட்டுமின்றி இஸ்ரேலின் பிற பகுதிகளிலும் ஹிஸ்புல்லாக்கள் சரமாரியாக புதன்கிழமை தாக்குதல் நடத்தினா்.