தீபாவளி திருநாள்: தலைவர்கள் வாழ்த்து

தீபாவளி திருநாளையொட்டி, தமிழக மக்களுக்கு ஆளுநர் மற்றும் அரசியல் கட்சிகளின் தலைவர்கள் வாழ்த்து கூறியுள்ளனர்.

ஆளுநர் ஆர்.என்.ரவி: உலகம் முழுவதும் வசிக்கும் தமிழ்நாட்டைச் சேர்ந்த சகோதர, சகோதரிகளுக்கு மனமார்ந்த தீபாவளி திருநாள் நல்வாழ்த்துகளை தெரிவித்துக் கொள்கிறேன். தீமையின் மீது நன்மையின் வெற்றியையும், இருளின் மீது ஒளியின் வெற்றியையும், அறியாமையின் மீது ஞானத்தின் வெற்றியையும் 'தீபாவளி' குறிக்கிறது. அன்னை லட்சுமி நம் இதயங்களை அளவற்ற அன்பு மற்றும் ஆழ்ந்த இரக்கத்தால் ஒளிரச் செய்து, அனைவருக்கும் மிகுந்த மகிழ்ச்சி, நல்ல ஆரோக்கியம், செழிப்பு, சமுதாயத்தில் ஒற்றுமை மற்றும் ஒருமைப்பாட்டை வளர்த்து அருள்புரிவாராக.