சீக்கிய பிரிவினைவாதிகளைக் குறிவைக்க உத்தரவிட்டார் அமித் ஷா - கனடா அமைச்சர் பரபரப்பு குற்றச்சாட்டு

கனடாவில் சீக்கிய பிரிவினைவாதிகள் குறிவைத்து வன்முறை, மிரட்டல் மற்றும் உளவுத் தகவல்கள் சேகரிப்பு நடவடிக்கையை மேற்கொள்ள இந்திய உள்துறை அமைச்சர் அமித் ஷா உத்தரவிட்டதாக, அந்நாட்டின் வெளியுறவுத் துறை இணையமைச்சர் டேவிட் மோரிசன் குற்றஞ்சாட்டினார்.

கனடா நாடாளுமன்றத்தின் தேசிய பாதுகாப்புக் குழுவிடம் செவ்வாய்க்கிழமை விளக்கமளித்தபோது அவர் இதைத் தெரிவித்தார்.

முன்னதாக, கனடாவில் சீக்கிய பிரிவினைவாதிகளுக்கு எதிரான சதித்திட்டங்களின் பின்னணியில் அமித் ஷா உள்ளார் என கனடா உயரதிகாரிகள் கூறியதாக, அமெரிக்காவின் 'தி வாஷிங்டன் போஸ்ட்' நாளிதழ் அண்மையில் செய்தி வெளியிட்டது. அந்த நாளிதழின் செய்தியாளரிடம் அமித் ஷாவின் பெயரை தாம் உறுதி செய்ததாக, தேசிய பாதுகாப்புக் குழுவிடம் அமைச்சர் மோரிசன் தற்போது தெரிவித்துள்ளார்.

தி வாஷிங்டன் போஸ்ட் நாளிதழின் செய்தியாளர் என்னைத் தொடர்புகொண்டு பேசினார். அப்போது, அமித் ஷாவின் பெயரை உறுதிசெய்தேன் என்று அமைச்சர் குறிப்பிட்டார். எனினும், இந்த விவகாரம் குறித்த கூடுதல் விவரங்களை அவர் தெரிவிக்கவில்லை.

நிஜ்ஜார் கொலை விவகாரம்: காலிஸ்தான் பயங்கரவாதி ஹர்தீப் சிங் நிஜ்ஜார் கனடாவில் அடையாளம் தெரியாத நபர்களால் கடந்த 2023, ஜூன் 18-ஆம் தேதி சுட்டுக் கொல்லப்பட்டார்.