அறங்காவலர் குழுவினர் - தீட்சிதர்கள் வாக்குவாதம்

சிதம்பரம் நடராஜர் கோயிலில் தனி சந்நிதியாக உள்ள தில்லை கோவிந்தராஜப் பெருமாள் கோயில் கொடிமரத்தை மாற்ற ஞாயிற்றுக்கிழமை மாலை அறங்காவலர் குழுவினர் பூர்வாங்க பூஜைகள் செய்ய முயன்றனர். இதனால், அவர்களுக்கும், தீட்சிதர்களுக்கும் இடையே வாக்குவாதம் ஏற்பட்டது. இதையடுத்து, போலீஸார் இரு தரப்பினரையும் சமரசம் செய்து பேச்சுவார்த்தைக்கு அழைத்துச் சென்றனர்.

சிதம்பரம் நடராஜர் கோயிலில் சைவர்களின் நடராஜர் சந்நிதியும், வைணவர்களின் தில்லை கோவிந்தராஜப் பெருமாள் சந்நிதியும் அமைந்துள்ளன.

தில்லை கோவிந்தராஜப் பெருமாள் கோயிலில் பிரம்மோற்சவம் நடத்தப்படவுள்ளதால், இந்தக் கோயிலில் சேதமடைந்த கொடிமரத்தை அகற்றிவிட்டு, புதிய கொடிமரம் நிறுவ தீர்மானிக்கப்பட்டுள்ளது. இதற்கு இந்து சமய அறநிலையத் துறை இணை ஆணையர் உத்தரவும் பிறப்பித்துள்ளார். நவம்பர் 4-ஆம் தேதி பழைய கொடிமரத்தை அகற்றி வேறு கொடிமரம் அமைக்க பாலாலயம் செய்யப்பட உள்ளது என்று கோயில் அறங்காவலர் சுதர்சனம், கோயில் பொது தீட்சிதர்களின் செயலருக்கு கடிதம் அனுப்பினார்.