அலிகர் முஸ்லிம் பல்கலை.யின் சிறுபான்மை அந்தஸ்துக்கு எதிரான தீர்ப்பு ரத்து

புது தில்லி, நவ. 8: உத்தர பிரதேச மாநிலத்தில் உள்ள அலிகர் முஸ்லிம் பல்கலைக்கழகத்தின் சிறுபான்மை கல்வி நிறுவன அந்தஸ்தை ரத்து செய்து உச்சநீதிமன்ற 5 நீதிபதிகள் அடங்கிய அரசியல் சாசன அமர்வு கடந்த 1967-இல் பிறப்பித்த தீர்ப்பை உச்சநீதிமன்ற 7 நீதிபதிகள் அமர்வு வெள்ளிக்கிழமை ரத்து செய்து உத்தரவிட்டது.

உச்சநீதிமன்ற தலைமை நீதிபதி டி.ஒய். சந்திரசூட் தலைமையிலான 7 நீதிபதிகள் அமர்வில், 4:3 என்ற பெரும்பான்மை அடிப்படையில் இந்த தீர்ப்பு அளிக்கப்பட்டது.

அமர்வில் இடம்பெற்ற 3 நீதிபதிகள் எதிரான தீர்ப்பை அளித்ததை தொடர்ந்து, 'இந்த விவகாரம் தொடர்பாக உச்சநீதிமன்றம் வெள்ளிக்கிழமை அளித்த தீர்ப்பில் குறிப்பிட்டுள்ள தத்துவங்களின் அடிப்படையில் அலிகர் முஸ்லிம் பல்கலைக்கழகம் சிறுபான்மை கல்வி நிறுவனமா என்பது தீர்மானிக்கப்பட வேண்டும். எனவே, உச்சநீதிமன்ற நிர்வாகம் தலைமை நீதிபதியின் அறிவுறுத்தல்களை பெற்ற பிறகு, புதிய முறையான அமர்வில் விசாரணை மேற்கொள்ள இந்த வழக்கு ஆவணங்கள் தாக்கல் செய்யப்பட வேண்டும்' என்று தலைமை நீதிபதி தீர்ப்பளித்தார்.

வழக்கின் பின்னணி: அலிகர் முஸ்லிம் பல்கலைக்கழகத்தின் சிறுபான்மை கல்வி நிறுவன அந்தஸ்து சர்ச்சை பல ஆண்டுகளாக நீடித்து வருகிறது.

இந்த விவகாரம் தொடர்பாக எஸ். ஆசீஷ் பாஷா என்பவருக்கும், மத்திய அரசுக்கும் இடையேயான வழக்கில் கடந்த 1967-ஆம் ஆண்டு தீர்ப்பளித்த உச்சநீதிமன்ற 5 நீதிபதிகள் கொண்ட அரசியல் சாசன அமர்வு, 'அரசின் நிதியுதவியுடன் மத்திய பல்கலைக்கழகமாக அலிகர் முஸ்லிம் பல்கலைக்கழகம் செயல்பட்டுவரும் நிலையில், சிறுபான்மை கல்வி நிறுவன அந்தஸ்தை கோர முடியாது' என்று தீர்ப்பளித்தது. இதனால், பல்கலைக்கழகத்தின் சிறுபான்மை நிறுவன அந்தஸ்து ரத்தானது.

இந்நிலையில், 1981-ஆம் ஆண்டு நாடாளுமன்றத்தில் இயற்றப்பட்ட அலிகர் முஸ்லிம் பல்கலைக்கழக திருத்தச் சட்டத்தின் மூலம், இந்த பல்கலைக்கழகம் மீண்டும் சிறுபான்மை கல்வி நிறுவன அந்தஸ்தை பெற்றது.