தமிழ் கூறும் ஆசிரியர் பண்பு

காந்தம் தன்னுடன் சேர்ந்த இரும்புத் துண்டை காந்தமாக்குகிறது. நெருப்பு தான் சேர்ந்த பொருளையும் அவ்வண்ணம் ஆக்கிவிடுகிறது. தயிர் தன்னுடன் சேர்ந்த பாலுக்கும் (விரைவில் கெடத்தக்கது) முக்தி அளித்து வெண்ணையாக, நெய்யாக (விரைந்து கெடாத) உருவாகும் வாய்ப்பை / பதத்தை ஏற்படுத்தித் தருகிறது.

- முனைவர் பா. சக்திவேல்

நீரோட்டம் தன்னுள் சேர்ந்த பொருளையும் தூய்மை செய்து இழுத்துச் சென்று வளமான பகுதிக்குக் கொண்டு சேர்க்கிறது. குருவானவர் திருவாக இருந்து ஒரு மனிதன், மனிதனாக மனிதத்தோடு உருவாகக் காரணமாக இருப்பவர்.

மாதா, பிதா, குரு, தெய்வம் என்ற வரிசையில், ஒருவர் பிறப்பதற்குக் காரணமாக இருந்தவர்களுக்கு அடுத்து, சிறப்பதற்கு காரணமாக இருந்த ஆசிரியர்கள் இருக்கின்றனர். ஆசிரியர்களின் வழிகாட்டுதல்களும், நெறி ஆளுகைகளும் சிறியோர்களாய் இருந்தவர்களைப் பெரியோர்களாக நிமிர்ந்து நிற்கச் செய்கிறது என்பதில் ஐயமில்லை. அப்படி தெய்வத்திற்கு நிகராகத் தொழப்படும் ஆசிரியர்கள் குறித்து தமிழிலக்கியத்தில் பல எடுகோள்கள் உள்ளன.