மத்திய அரசுத் திட்டங்களின் கீழ் அதிக கடனுதவி

மத்திய அரசுத் திட்டங்களின் கீழ் கடனுதவிகள் வழங்குவதை அதிகப்படுத்த வேண்டும் என மத்திய நிதியமைச்சர் நிர்மலா சீதாராமன் கேட்டுக்கொண்டார்.

பெங்களூரில் சனிக்கிழமை நடைபெற்ற கர்நாடகம், தமிழகம், கேரளம், ஆந்திரம், தெலங்கானா போன்ற தென்மாநிலங்கள், புதுச்சேரி யூனியன் பிரதேசங்களில் செயல்பட்டு வரும் 10 பிராந்திய ஊரக வங்கிகளின் செயல்பாடுகள் குறித்த ஆய்வுக் கூட்டத்தில் பங்கேற்று அவர் பேசியதாவது:

பிரதமரின் முத்ரா திட்டம், விஸ்வகர்மா திட்டம் போன்ற மத்திய அரசுத் திட்டங்களின் கீழ் கடனுதவிகள் வழங்குவதை பிராந்திய ஊரக வங்கிகள் அதிகப்படுத்த வேண்டும். பால்பண்ணை, கால்நடை, மீன்வளம் போன்ற வேளாண்சார் தொழில்களை இலக்காக வைத்துக்கொண்டு வேளாண் கடனுதவிகளை அதிக அளவில் வழங்க வேண்டும். அது, அந்தந்தப் பகுதியில் வேளாண் நடவடிக்கைகளை ஊக்குவிக்க உதவியாக இருக்கும்.

கேரளத்தில் மீன்வளர் தொழில், தெலங்கானாவில் பால்பண்ணை தொழில்களுக்கு அதிக கடனுதவிகளை அளிக்க மாநில அரசுகளுடன் இணைந்து செயலாற்ற வேண்டும்.