20 லட்சம் இளைஞர்களுக்கு தொழில் தொடங்க பயிற்சி அளிப்பு

தமிழகத்தில் கடந்த மூன்றரை ஆண்டுகளில் 20 லட்சத்து 47 ஆயிரத்து 440 இளைஞர்கள், மாணவர்களுக்கு தொழில் தொடங்க பயிற்சி வழங்கப்பட்டுள்ளதாக குறு, சிறு மற்றும் நடுத்தொழில் நிறுவனங்கள் துறை அமைச்சர் தா.மோ.அன்பரசன் தெரிவித்தார்.

சென்னை கிண்டி அண்ணா பல்கலைக்கழகத்தில் எம்எஸ்எம்இ துறையின் தொழில் முனைவோர் மேம்பாடு மற்றும் புத்தாக்க நிறுவனம் சார்பில் புத்தாக்க கண்டுபிடிப்பு கண்காட்சியை அமைச்சர்கள் மா.சுப்பிரமணியன், தா.மோ.அன்பரசன் ஆகியோர் தொடங்கி வைத்து பார்வையிட்டனர்.

இதைத்தொடர்ந்து நடைபெற்ற நிகழ்ச்சியில் அமைச்சர் தா.மோ.அன்பரசன் பேசியதாவது: இந்த கண்காட்சியில் நமது மாணவர்களின் புதிய கண்டுபிடிப்புகளான உயர் தொழில்நுட்ப விவசாய வாகனம், பழம் வெட்டும் கருவி, ஒலி மாசுவை கட்டுப்படுத்தும் கருவி, கழிவறையை பயன்படுத்திய பின் தானாகவே சுத்தப்படுத்தும் கருவி, பொதுக்குழாய்களில் தண்ணீர் வீணாவதை தடுக்கும் கருவி, நகரும் சோலார் பேனல் என பல்வேறு கண்டுபிடிப்புகள் காட்சிப்படுத்தப்பட்டுள்ளன.