ராஜஸ்தான்: துணை மாவட்ட ஆட்சியரை அறைந்த சுயேச்சை வேட்பாளர் கைது

ராஜஸ்தான் மாநிலம், டோங்க் மாவட்டத்தில் நடைபெற்ற பேரவை இடைத்தேர்தலின்போது துணை மாவட்ட ஆட்சியரை கன்னத்தில் அறைந்த சுயேச்சை வேட்பாளர் நரேஷ் மீனாவை காவல் துறையினர் வியாழக்கிழமை கைது செய்தனர்.

மீனாவின் ஆதரவாளர்கள் நடத்திய வன்முறையில் ஏராளமான வாகனங்கள் தீயிட்டு கொளுத்தப்பட்டன.

ராஜஸ்தான் மாநிலத்தில் உள்ள 7 சட்டப்பேரவைத் தொகுதிகளுக்கு இடைத்தேர்தல் புதன்கிழமை நடைபெற்றது. இதில், டோங்க் மாவட்டத்தில் உள்ள தியோலி-உனியாராதொகுதியில் காங்கிரஸ் அதிருப்தியாளரான நரேஷ் மீனா சுயேச்சை வேட்பாளராக போட்டியிட்டார்.

உனியாரா வட்டத்தில் சம்ரவ்தா கிராமத்தை இணைக்கக் கோரி தேர்தல் புறக்கணிப்பில் ஈடுபட்டிருந்த அந்த கிராம மக்களை துணை மாவட்ட ஆட்சியர் அமித் செளதரி அழைத்து வந்து வாக்களிக்கும் முயற்சியில் ஈடுபட்டிருந்தார்.

இதற்கு எதிர்ப்பு தெரிவித்து நரேஷ் மீனா தனது ஆதரவாளர்களுடன் வாக்குப் பதிவு மையத்துக்கு அருகே போராட்டம் நடத்தினார்.