கிண்டி அரசு மருத்துவமனையில் இளைஞர் திடீர் உயிரிழப்பு

உறவினர்கள் போராட்டம்

சென்னை, நவ.15: சென்னை கிண்டி அரசு உயர் சிறப்பு மருத்துவமனையில் சிகிச்சை பெற்று வந்த இளைஞர் வெள்ளிக்கிழமை திடீரென உயிரிழந்தார். போதிய மருத்துவர்கள் பணியில் இல்லாத நிலையில், உரிய சிகிச்சை வழங்கப்படாமல் அவர் உயிரிழந்ததாக உறவினர்கள் குற்றஞ்சாட்டி போராட்டத்தில் ஈடுபட்டதால் பரபரப்பு ஏற்பட்டது.

சென்னை பெரும்பாக்கத்தைச் சேர்ந்தவர் விக்னேஷ் (33), மெக்கானிக். அவர் கடந்த 13-ஆம் தேதி இரவு கிண்டி அரசு உயர் சிறப்பு மருத்துவமனையில் வயிற்று வலி காரணமாக அனுமதிக்கப்பட்டார். அங்கு அவருக்கு சிகிச்சை வழங்கப்பட்டு வந்த நிலையில் வெள்ளிக்கிழமை காலை விக்னேஷ் உயிரிழந்தார்.

போதிய எண்ணிக்கையில் மருத்துவர்கள் பணியில் இல்லாததும், முறையான சிகிச்சை அளிக்காததும்தான் உயிரிழப்புக்கு காரணம் எனக் கூறி அவரது உறவினர்கள் குற்றஞ்சாட்டினர். அவரது உடலைப் பெற மறுத்து மருத்துவமனை வளாகத்தில் அவர்கள் போராட்டத்தில் ஈடுபட்டனர்.