மறைமலை அடிகளாரின் பேத்திக்கு வீடு ஒதுக்கீடு

தஞ்சாவூரில் வறுமையில் வாடும் மறைமலை அடிகளாரின் பேத்தி லலிதாவுக்கு, தமிழக முதல்வரின் உத்தரவுப்படி தமிழ்நாடு நகர்ப்புற வாழ்விட மேம்பாட்டு வாரிய குடியிருப்பில் வீடு ஒதுக்கீடு செய்யப்பட்டு, அதற்கான சாவியை உயர் கல்வித் துறை அமைச்சர் கோவி. செழியன் புதன்கிழமை வழங்கினார்.

தனித்தமிழ்த் தந்தை எனப் போற்றப்படுகிற மறைமலை அடிகளாரின் மகன் பச்சையப்பனின் மகளாகிய லலிதா (43) தனது கணவர் செந்தில்குமார், இரு குழந்தைகளுடன் தஞ்சாவூர் கீழவாசல் டபீர்குளம் பகுதியில் வசித்து வருகிறார். இவர் தஞ்சாவூர் மாவட்ட ஆட்சியரகத்தில் திங்கள்கிழமை நடைபெற்ற மக்கள் குறைதீர் நாள் கூட்டத்தில், வாடகை வீட்டில் வசித்து வரும் எங்களுக்கு போதிய வருமானம் இல்லாததால் வாடகை தொகை செலுத்த முடியவில்லை என்றும், எனவே குடிசை மாற்றுவாரியத்தில் வீடும், மகளிர் உரிமைத்தொகை வழங்கவும் நடவடிக்கை எடுக்குமாறு கோரி மனு அளித்தார்.