எதிர்க்கட்சிகள் அமளி: இரண்டாம் நாளிலும் முடங்கியது நாடாளுமன்றம்

தொழிலதிபர் அதானி மீதான அமெரிக்க நீதித்துறையின் லஞ்ச குற்றச்சாட்டு, உத்தர பிரதேச மாநில சம்பல் பகுதி வன்முறை உள்ளிட்ட விவகாரங்களை எழுப்பி எதிர்க்கட்சி உறுப்பினர்கள் தொடர் அமளியில் ஈடுபட்டதால் நாடாளுமன்ற குளிர்கால கூட்டத்தொடரின் இரண்டாம் நாள் அமர்வும் முழுமையாக முடங்கியது.

இந்த விவகாரங்கள் குறித்து விவாதம் நடத்த அனுமதிக்க வலியுறுத்தி கோஷங்களை எழுப்பியபடி எதிர்க்கட்சி எம்.பி.க்கள் அமளியில் ஈடுபட்டதால், மக்களவை, மாநிலங்களவை என இரு அவைகளும் அலுவல்கள் ஏதும் நடைபெறாமல் புதன்கிழமை நாள் முழுவதும் ஒத்திவைக்கப்பட்டது.

நாடாளுமன்ற குளிர்காலக் கூட்டத்தொடர் திங்கள்கிழமை தொடங்கிய நிலையில், இந்த விவகாரங்களை எழுப்பி எதிர்க்கட்சி உறுப்பினர்கள் தொடர் அமளியில் ஈடுபட்டனர். அதனால், முதல் நாளேயே நாடாளுமன்ற இரு அவைகளும் முடங்கின.

இதற்கிடையே, நாட்டின் அரசியல் சட்டம், அரசியல் நிர்ணய சபையால் ஏற்கப்பட்டதன் 75-ஆம் ஆண்டு தினத்தையொட்டி, பழைய நாடாளுமன்றத்தின் மைய மண்டபத்தில் இரு அவைகளின் சிறப்பு அமர்வு செவ்வாய்க்கிழமை நடைபெற்றது. அதன் காரணமாக, அன்றைய தினம் குளிர்கால கூட்டத்தொடர் அலுவல்கள் எதுவும் நடைபெறவில்லை.