தாக்குப் பிடிப்பாரா அண்ணாமலை?

லண்டனில் மூன்று மாத படிப்பை முடித்து விட்டு தமிழகம் திரும்புகிறார் மாநில பாஜக தலைவர் கே.அண்ணாமலை.

- பீ. ஜெபலின் ஜான்

கே. அண்ணாமலை. கடந்த 30 ஆண்டுகளாக தனித்து நின்றும், கூட்டணி சேர்ந்தும் தமிழகத்தில் பாஜகவால் பெரிய அளவில் காலூன்ற முடியவில்லை. 2014 மக்களவைத் தேர்தலில் திமுக, அதிமுகவுக்கு மாற்றாக பாஜக உருவாக்கிய வலுவான கூட்டணி 18.8% வாக்குகளைப் பெற்றது.

அந்தக் கூட்டணியில் பாஜகவை விடக் கூடுதல் வாக்கு வங்கி வைத்திருந்த பாமக, தேமுதிக, மதிமுக, கொங்கு மண்டலத்தில் செல்வாக்கு பெற்றிருந்த கொமதேக ஆகியவை இடம்பெற்றிருந்தன. ஆனால், இரண்டு தொகுதிகளில் மட்டுமே அந்தக் கூட்டணியால் வெற்றி பெற முடிந்தது.

2016 பேரவைத் தேர்தலில் தனது கூட்டணிக் கட்சிகளை பாஜகவால் தக்கவைக்க முடியவில்லை. இதனால் பாஜகவின் வாக்கு வங்கி 5.5%-இலிருந்து 2.7%-ஆக சரிந்தது. 2019 மக்களவைத் தேர்தலில் அதிமுக-பாஜக கூட்டணி அமைந்தபோதும் அது படு தோல்வியையே சந்தித்தது. பாஜகவுக்கு 3.7% வாக்குகள்தான் கிடைத்தன. 2021 பேரவைத் தேர்தலில் அதிமுகவிடம் 20 இடங்களைப் பெற்ற பாஜக 4 தொகுதிகளில் வென்றது; எனினும், அதன் வாக்கு வங்கி வெறும் 2.6% மட்டுமே.

இந்தச் சூழலில்தான் மாநிலத் தலைவராக கே.அண்ணாமலை நியமிக்கப்பட்டார். பதவிக்கு வந்த ஓராண்டிலேயே நகர்ப்புற உள்ளாட்சித் தேர்தலில் தனித்துப் போட்டியிட்ட பாஜக, 5% வாக்குகளைப் பெற்று கவனம் ஈர்த்தது. 2022-இல் பாஜக தனித்துப் போட்டியிட்டு சென்னையில் ஒரு மாமன்ற உறுப்பினரைப் பெற்றது.

இதற்கிடையே, திமுக எதிர்ப்பு அரசியலை தீவிரமாகக் கையிலெடுத்த அண்ணாமலை, 'என் மண் என் மக்கள்' எனும் நடைப்பயணத்தை மாநிலம் முழுவதும் மேற்கொண்டார். தொடர்ந்து அண்ணா, ஜெயலலிதா ஆகியோரை அண்ணாமலை விமர்சனம் செய்ததால் அதிமுக-பாஜக கூட்டணி முறிந்தது.