கடலோரப் பகுதிகளை சூறையாடிய ‘ஃபென்ஜால்’

சென்னை கடலோரப் பகுதிகளை ஃபென்ஜால் புயல் சூறையாடியது. இதனால், அதிக அளவில் சேதம் ஏற்பட்டது.

சென்னையில் சனிக்கிழமை காலை முதலே கடல் கொந்தளிப்பு, சீற்றத்துடன் காணப்பட்டதால் கடற்கரைக்கு பொதுமக்கள் செல்ல முடியவில்லை. அதேவேளையில், பொதுமக்கள் கடற்கரைக்கு செல்ல வேண்டாம் என அரசும் ஏற்கெனவே அறிவுறுத்தியிருந்தது.

கழிமுகங்களை கடந்த கடல் நீர்: நேரம் செல்லச் செல்ல கடல் அலைகளின் வேகம் அதிகரித்தது. அலைகள் பல அடி உயரத்துக்கு எழும்பி ஆர்ப்பரித்தன. கடல் நீர் பல மீட்டர் தூரத்துக்கு முன்னேறி வந்தது.

இதன் விளைவாக பட்டினப்பாக்கம் அடையாறு கழிமுகப் பகுதி, மெரீனா நேப்பியர் பாலம் அருகே கூவம் கழிமுகப் பகுதி, முட்டுக்காடு கிழக்கு கடற்கரை சாலை பாலம் அருகே உள்ள பக்கிங்காம் கால்வாய் கழிமுகப் பகுதி ஆகிய இடங்களில் கடல் நீர் உள்ளே புகுந்தது. இங்கு கழிமுக பகுதிகளில் இருந்து பல மீட்டர் தூரத்துக்கு ஆற்றுப் பகுதிக்குள் கடல் நீர் சென்றது. முக்கியமாக கூவம் கழிமுகப் பகுதியில் நேப்பியர் பாலத்தைத் தாண்டி கடல் நீர் சென்றதை காண முடிந்தது.