தருமபுரி மாவட்டத்தில் கனமழை: தரைப் பாலங்கள் மூழ்கின

தருமபுரி, டிச. 2: ஃபென்ஜால் புயல் காரணமாக தருமபுரி மாவட்டத்தில் தொடர்ந்து பெய்து வரும் கனமழையால் பல்வேறு இடங்களில் ரயில்வே பாலங்கள், தரைப்பாலங்கள் நீரில் மூழ்கின. சாலைகள் துண்டிக்கப்பட்டன. கடந்த 24 மணி நேரத்தில் மாவட்டத்தில் மொத்தம் 981.9 மி.மீ. மழை பதிவானது. இதனால் மக்களின் இயல்பு வாழ்க்கை பாதிப்படைந்தது.

தருமபுரி மாவட்டத்தில் கடந்த மூன்று நாள்களாக இடைவிடாமல் தொடர்ந்து மழை பெய்து வருகிறது. இதனால், நீர்நிலைகள் வேகமாக நிரம்பி வருகின்றன. ஞாயிற்றுக்கிழமை வழக்கத்தைவிட காலை முதலே கனமழை பெய்தது. இந்த மழை திங்கள்கிழமை காலை வரை நீடித்தது. இதனால், பல்வேறு இடங்களில் தாழ்வான பகுதிகளில் மழைநீர் சூழ்ந்தது.

தருமபுரி நகரில் ஆவின் நகர், ஏஎஸ்டிசி நகர், நந்தி நகர் ஆகிய பகுதிகளில் மழை வெள்ளம் சூழ்ந்தது. இதனால் இப்பகுதி மக்கள் பெரும் சிரமம் அடைந்தனர்.