கர்நாடக முன்னாள் முதல்வர் எஸ்.எம்.கிருஷ்ணா மறைவு: தலைவர்கள் இரங்கல்

கர்நாடக மாநில முன்னாள் முதல்வரும், முன்னாள் மத்திய அமைச்சருமான எஸ்.எம். கிருஷ்ணா (92) முதுமை காரணமாக செவ்வாய்க்கிழமை காலமானார்.

அவரது மறைவுக்கு பிரதமர் மோடி, முதல்வர் சித்தராமையா உள்ளிட்ட தலைவர்கள் இரங்கல் தெரிவித்தனர்.

1999 முதல் 2004ஆம் ஆண்டு வரை கர்நாடகத்தின் முதல்வராக பதவி வகித்தவர் எஸ்.எம். கிருஷ்ணா. கடந்த சில ஆண்டுகளாகவே முதுமை சார்ந்த உடல்நலக்குறைவால் அவதியுற்று வந்தார். அவ்வப்போது மணிபால் மருத்துவமனையில் அனுமதிக்கப்பட்டு சிகிச்சை பெற்று வந்த அவர், தனது வீட்டில் கடந்த சில மாதங்களாக மருத்துவக் கண்காணிப்பில் இருந்து வந்தார். இந்நிலையில், செவ்வாய்க்கிழமை அதிகாலை 2.45 மணிக்கு அவர் காலமானார். அவருக்கு மனைவி பிரேமா, மகள்கள் மாளவிகா, சாம்பவி ஆகியோர் உள்ளனர்.

வாழ்க்கைக் குறிப்பு: கர்நாடக மாநிலம், மண்டியா மாவட்டம், சோமனஹள்ளியில் 1932ஆம் ஆண்டு மே 1ஆம் தேதி பிறந்த எஸ்.எம். கிருஷ்ணா ஆரம்பக் கல்வியை மைசூரிலும், சட்டக்கல்வியை பெங்களூரிலும் முடித்துள்ளார். முதுகலை சட்டப்படிப்புக் காக அமெரிக்கா சென்று திரும்பிய அவர், 1962 இல் அரசியலில் ஈடுபடத் தொடங்கினார். அதே ஆண்டில் மத்தூர் சட்டப்பேரவைத் தொகுதியில் சுயேச்சை வேட்பாளராகப் போட்டியிட்டு எம்எல்ஏ ஆனார். பின்னர் பிரஜா சோசலிஸ்ட் கட்சியில் இணைந்து பணியாற்றினார். 1968-இல் மண்டியா மக்களவைத் தொகுதியில் போட்டியிட்டு வென்றார். அதன்பிறகு காங்கிரஸ்கட்சியில் இணைந்து, 1971, 1980ஆம் ஆண்டுகளில் நடந்த மக்களவைத் தேர்தலில் மண்டியா தொகுதியில் இருந்து தேர்ந்தெடுக்கப்பட்டார். 1972 இல் மக்களவை உறுப்பினர் பதவியை அவர் ராஜினாமா செய்தார்.