பாலியல் வன்முறை: மீண்டும் மீண்டும்..!

சட்டங்கள் மட்டும் போதாது. சமுதாயமும் மாற வேண்டும். பெண்களைப் பற்றிய கண்ணோட்டத்தை மாற்றிக்கொள்ள வேண்டும். பெண்களின் பாதுகாப்புக்கான சட்டங்களைப் பற்றிய விழிப்புணர்வு பரவலாக வேண்டும். பெண்கள் துணிவு கொள்ள வேண்டும். தொடர் போராட்டங்கள் வேண்டும்.

- முனைவர் இரா. கற்பகம்

கொல்கத்தா பெண் மருத்துவருக்கே தைரியமாகப் புகார் செய்கிறார்; இன்னும் நீதி கிடைத்தபாடில்லை; அதற்குள் சென்னையில், அண்ணா பல்கலைக்கழக வளாகத்தில் ஒரு பாலியல் வன்முறை நடந்துள்ளது. மீண்டும் மீண்டும் பெண்கள் வன்முறைக்கு ஆளாகிறார்களே, நம் நாட்டில் பெண்களுக்குப் பாதுகாப்பு இருக்கிறதா, இல்லையா? பெண்களுக்கு நீதி கிடைக்குமா, இல்லையா? பெண்கள் பாதுகாப்புக்கெனச் சட்டங்கள் பல இருக்கின்றன; அவற்றைப் பற்றி பெண்களுக்கும் சரி, ஆண்களுக்கும் சரி தெரியவில்லை; அவற்றை நன்கு அறிந்தும் முறையாக நடைமுறைப்படுத்தும் உறுதி அரசு இயந்திரத்துக்கு இல்லை.

1956-ஆம் ஆண்டிலிருந்து 'பெண்களைக் கடத்திப் பாலியல் தொழிலில் ஈடுபடுத்துவதைத் தடை செய்யும் சட்டம்' (1956), நடைமுறையிலுள்ளது. ஆனால் இன்றும் நம் நாட்டில் எத்தனை பெண்கள், எத்தனை சிறுமிகள் கடத்தப்பட்டுப் பாலியல் தொழிலில் ஈடுபடுத்தப்படுகிறார்கள்? இவர்களில் எத்தனை பேர் மீட்கப்பட்டு மறுவாழ்வு பெறுகிறார்கள்? எத்தனை பேர் கடைசிவரை அப்படியே இருந்துவிடுகிறார்கள் என்ற புள்ளிவிவரங்கள் அரசுகளிடம் உள்ளதா? இதைப் பற்றிய விழிப்புணர்வு பெண்களிடம் உள்ளதா? இச்சட்டம் உண்மையிலேயே பெண்களுக்குப் பாதுகாப்புத் தருகிறதா? இக் கேள்விகளுக்குத் தெளிவான பதில்கள் இல்லை.

பாலியல் தொழில் இருக்கும் வரை, பெண்களைச் சட்டத்துக்குப் புறம்பாகக் கடத்திச் சென்று, அத்தொழிலில் ஈடுபடுத்துவதை முற்றிலுமாக ஒழிக்க முடியாது. வரலாற்றைப் புரட்டிப் பார்ப்போம். தேவதாசி முறையை எதிர்த்து சட்டசபையில் முத்துலெட்சுமி அம்மையார் தீர்மானம் கொண்டு வந்தார். தேவதாசி ஒழிப்புச் சட்டம் நிறைவேறியது. பாலியல் தொழிலைப் 'புராதனத் தொழில்' என்று கருதும் சமுதாயம் இருக்கும் வரை, ஆண்களின் உணர்ச்சி வடிகால்களுக்கு விலை மாதர்கள் தேவை என்று கருதும் ஆண் வர்க்கம் இருக்கும் வரை, பெண்களை வைத்துச் சம்பாதிக்கும் ஆண்களும் பெண்களும் இருக்கும் வரை, இச்சட்டத்தினால் பெண்களுக்குப் பெரிதாகப் பாதுகாப்புத் தந்துவிட முடியாது.

இப்போதுள்ள தொலைத்தொடர்பு வசதிகளும், வலைதளங்களின் மூலம் உருவாகும் கூடா நட்புகளும் உறவுகளும், இளம் பெண்களை வலையில் விழச் செய்கின்றன. அப்படி மாட்டிக் கொள்ளும் பெண்கள் எளிதில் தப்பித்து வர இயலாது. சட்டத்தை நிலைநாட்ட வேண்டிய காவல்துறைக் குத் தெரிந்தே இக்கொடுமைகள் நடக்கும் போது சட்டத்தினால் என்ன பயன்?