அரைஇறுதியில் இங்கிலாந்துடன்போதல்: அடிலெய்டு மைதானத்தில் அதிரடி காட்டுமா இந்தியா ?

ஒருவழியாக சூப்பர் 12 சுற்று முடிந்ததையடுத்து இந்திய அணி குரூப் 2 பிரிவில் 8 புள்ளிகளுடன் முதல் இடத்தைப் பிடித்து கம்பீரமாக உள்ளது.

குரூப் 2 பிரிவில் முதலிடத்தில் உள்ள இந்திய அணியும், குரூப் ஒன்றில் 2வது இடத்தில் உள்ள இங்கிலாந்து அணியும் நாளை மறுநாள் ஆஸ்திரேலியாவின் அடிலெய்டு மைதானத்தில் நேருக்கு நேர் மோதுகின்றன. இதில் வெற்றி பெறும் அணி நேரடியாக இறுதிச் சுற்றுக்கு தகுதி பெறும் என்பது குறிப்பிடத்தக்கது.

நடப்பு ஆண்டின் 20 ஓவர் உலகக் கோப்பை கிரிக்கெட் போட்டிகள் ஆஸ்திரேலியாவில் நடைபெற்று வருகிறது. நேற்று முன்தினத்துடன் இந்த போட்டிகளின் சூப்பர் 12 சுற்று நிறைவடைந்தது. இதனையடுத்து அரை இறுதிப் போட்டிகளில் மோதக்கூடிய 4 அணிகள் தேர்வாகியுள்ளன. அதன்படி நாளை ஆஸ்திரேலியாவின் சிட்னி மைதானத்தில் மதியம் நடைபெறும் முதல் அரை இறுதிப் போட்டியில் குரூப் ஒன்றில் முதல் இடத்தைப் பிடித்த நியூஸிலாந்து அணியும், குரூப் 2வில் இரண்டாவது இடத்தைப் பிடித்த பாகிஸ்தான் அணியும் நேருக்கு நேர் மோதுகின்றன. நாளை மறுநாள் அடிலெய்டு மைதானத்தில் மதியம் நடைபெறும் 2வது அரை இறுதிப் போட்டியில் குரூப் 2வில் முதல் இடத்தில் உள்ள இந்தியாவும், குரூப் ஒன்றில் 2வது இடத்தில் உள்ள இங்கிலாந்தும் மோதுகின்றன.

சூப்பர் 12 சுற்று தொடங்கியபோது மோசமான ஆட்டத்தை வெளிப்படுத்திய பாகிஸ்தான் அணி அரையிறுதி சுற்றுக்குள் நுழையாது என்று அனைவராலும் எதிர்பார்க்கப்பட்டது. ஏனெனில் அந்த அளவுக்கு பாகிஸ்தானை துரதிர்ஷ்டம் துரத்தியது. ஆனால் நேற்று முன்தினம் நெதர்லாந்துடன் தென் ஆப்பிரிக்க அணி மோதிய ஆட்டத்தின் முடிவால் பாகிஸ்தானின் அரை இறுதி பயணம் பிரகாசமானது. தென் ஆப்பிரிக்க அணி நெதர்லாந்திடம் அதிர்ச்சி தோல்வி அடைந்ததால் அன்றைய தினத்தில் வங்கதேசத்தை தோற்கடித்தால் நாம் அரை இறுதிக்குள் நுழைந்து விடலாம் என்ற மகிழ்ச்சியில் பாகிஸ்தான் வீரர்கள் துள்ளி குதித்தனர். அதன்படி வங்கதேசத்தை வீழ்த்திய பாகிஸ்தான அணி அரையிறுதி சுற்றுக்குள் நுழைந்தது. முன்னதாக தென் ஆப்பிரிக்க அணி நெதர்லாந்திடம் தோல்வி அடைந்தபோதே இந்தியாவும் அரையிறுதிச் சுற்றுக்கு தகுதி பெற்றது என்பது குறிப்பிடத்தக்கது. சூப்பர் 12 சுற்றின் கடைசி ஆட்டத்தில் ஜிம்பாப்வே அணியை தோற்கடித்த பின்னரே அரை இறுதியில் இந்தியா இங்கிலாந்துடன் மோதுவது உறுதியானது.