டாக்டருக்கு கத்திக்குத்து சம்பவம் நடந்த கிண்டி மருத்துவமனையில் இன்று மீண்டும் பிரச்சினை!

வாலிபர் இறந்ததால் உறவினர்கள் முற்றுகையிட்டு போராட்டம்!!

டாக்டருக்கு கத்திக்குத்து சம்பவம் நடந்த கிண்டி மருத்துவமனையில் இன்று மீண்டும் பிரச்சினை ஏற்பட்டது. இங்கு சிகிச்சை பெற்ற வாலிபர் ஒருவர் இறந்ததால், அவரது உறவினர்கள் மருத்துவமனை முற்றுகையிட்டு போராட்டம் நடத்தினார்கள்.

சென்னை கிண்டியில் கலைஞர் நூற்றாண்டு உயர் சிறப்பு பன்முக மருத்துவமனை உள்ளது. இங்குப் புறநோய் சிகிச்சை பிரிவில் சிறப்பு மருத்துவராக பணிபுரியும் பாலாஜி (வயது 53) என்பவர் நேற்று முன்தினம் கத்தியால் குத்தப்பட்டார்.

அவரை தாம்பரத்தை அடுத்துள்ள பெருங்களத்தூர் காமராஜர் நகர் 1-ஆவது குறுக்குத் தெருவைச் சேர்ந்த விக்னேஷ் (வயது 25) என்பவர் கத்தியால் குத்தினார்.

தனது தாயாருக்கு சரிவர சிகிச்சை அளிக்காததால் தான் இத்தகைய செயலில் ஈடுபட்டதாக அவர் கூறினார்.

மருத்துவர் கத்தியால் குத்தப்பட்ட சம்பவம் பரபரப்பை ஏற்படுத்தியது. இதற்கு கண்டனம் தெரிவித்து சென்னை உள்ளிட்ட தமிழ்நாட்டில் அனைத்து மருத்துவமனைகளிலும் பணிபுரியும் அனைத்து மருத்துவர்களும் வேலை நிறுத்தப் போராட்டத்தில் ஈடுபட்டனர்.

அதைத் தொடர்ந்து மா. சுப்பிரமணியன் மருத்துவர்களுடன் பேச்சுவார்த்தை நடத்தினார்.