வாடிகனில் போப் ஆண்டவர் சிறப்புத் திருப்பலி: உலகம் முழுவதும் கிறிஸ்துமஸ் பண்டிகை கோலாகலம்!

தேவாலயங்களில் நள்ளிரவில் கிறிஸ்தவர்கள் பிரார்த்தனை!!

உலகம் முழுவதும் இன்று கிறிஸ்துமஸ் பண்டிகை கோலாகலமாக கொண்டாடப்பட்டது. தேவாலயங்களில், வாடிகன் தேவாலயத்தில் நடந்த நள்ளிரவில் பிரார்த்தனைகளில் ஏராளமான கிறிஸ்தவர்கள் கலந்து கொண்டனர். வாடிகனில் போப் ஆண்டவர் தலைமையில் சிறப்பு திருப்பலி நடை பெற்றது.

இந்தியா உள்பட உலகம் முழுவதும் கிறிஸ்துமஸ் பண்டிகை சிறப்பாக கொண்டாடப்பட்டு வருகிறது. கத்தோலிக்க கிறிஸ்தவர்களின் தலைமை இடமான இத்தாலியின் வாடிகன் நகரில் உள்ள புனித பீட்டர் பேராலயத்தில் நேற்று இரவு கிறிஸ்துமஸ் பண்டிகை கொண்டாடப்பட்டது. இதில் போப் ஆண்டவர் பிரான்சிஸ் கலந்து கொண்டார். அவரது தலைமையில் நள்ளிரவில் திருப்பலி மற்றும் பிரார்த்தனை நடைபெற்றது.

இதில் ஆயிரக்கணக்கானோர் கலந்து கொண்டனர். முன்னதாக அங்குள்ள பேராலயத்தில் குழந்தை இயேசுவின் சொரூபம் திறந்து வைக்கப்பட்டது. பின்னர் குடிலில் இருந்த குழந்தை இயேசுவின் சொரூபத்தை போப் ஆண்டவர் எடுத்து வந்து அங்கிருந்தவர்களிடம் காட்டினார். அதைத் தொடர்ந்து உலகத்தில் வாழும் கிறிஸ்தவர்கள் அனைவருக்கும் போப் ஆண்டவர் தனது கிறிஸ்துமஸ் வாழ்த்துகளை தெரிவித்து உரை நிகழ்த்தினார்.