മ്യൂച്വൽഫണ്ടിലെ മലയാളിപ്പണം 80,000 കോടിയിലേക്ക്

ബാങ്കുകൾ നിക്ഷേപം വർധിപ്പിക്കാൻ ശ്രദ്ധിക്കണമെന്ന് കേന്ദ്ര ധനമന്ത്രി നിർമല സീതാരാമനും ആവശ്യപ്പെട്ടിട്ടുണ്ട്.

കോഴിക്കോട്: ആളുകൾ സമ്പാദ്യം ബാങ്കുകളിൽ സ്ഥിരനിക്ഷേപമായും (എഫ്ഡി) മറ്റും നിക്ഷേപിക്കുന്നതിനു പകരം മ്യൂചൽ ഫണ്ട് പദ്ധതികളിലേക്ക് ഒഴുക്കുകയാണെന്ന ആശങ്ക' റിസർവ് ബാങ്ക് പങ്കുവച്ചിട്ട് അധിക കാലമായിട്ടില്ല. ഈ ശീലം മലയാളികൾക്കും വലിയ ഇഷ്ടമായെന്ന് വ്യക്തമാക്കുകയാണ് ഔദ്യോഗിക കണക്കുകൾ.

അസോസിയേഷൻ ഓഫ് മ്യൂച്വൽ ഫണ്ട്സ് ഇൻ ഇന്ത്യയുടെ (ആംഫി) കണക്കുപ്രകാരം കഴിഞ്ഞമാസം (ജൂലൈ) കേരളത്തിൽ നിന്നുള്ള മൊത്തം മ്യൂച്വൽഫണ്ട് നിക്ഷേപ ആസ്തി (എയുഎം) 78,411.01 കോടി രൂപയിലെത്തി. ഇത് സർവകാല റെക്കോർഡാണ്. നിലവിലെ വളർച്ചാൻഡ് പരിഗണിച്ചാൽ ഈ മാസത്തെ (ഓഗസ്റ്റ്) മൊത്തം നിക്ഷേപ ആസ്തി 80,000 കോടി രൂപ കടക്കുമെന്നാണ് വിലയിരുത്തൽ.

10 വർഷം മുമ്പ് (2014 ജൂലൈ) മ്യൂച്വൽ ഫണ്ടിലെ മൊത്തം മലയാളി നിക്ഷേപം 8,440 കോടി രൂപ മാത്രമായിരുന്നു. 5 വർഷം മുമ്പ് (2019 ജൂലൈ 26,867 കോടി രൂപയും; ഇതാണ് കഴിഞ്ഞ 5 വർഷം കൊണ്ട് രണ്ടിരട്ടിയോളം ഉയർന്നത്. ഈ വർഷത്തിന്റെ തുടക്കത്തിൽ (2024 ജനുവരി) മലയാളികളുടെ മ്യൂച്വൽഫണ്ട് നിക്ഷേപ ആസ്തി 61,708 കോടി രൂപയായിരുന്നു. ഓരോ മാസവും നിക്ഷേപം വൻതോതിൽ കൂടുന്നു എന്ന് ഇത് വ്യക്തമാക്കുന്നു.