વહેલી સવારથી અનરાધારઃ અમદાવાદ ફરી જળબંબાકાર

સોમવારે સાંજથી જ મેઘરાજાની તોફાની બેટિંગઃ રાતભર ૧૧ સ્થળોએ વરસાદી પાણી ઉલેચવા પંપ ચાલતા રહ્યાઃ આજે સવારે ૧૦.૦૦ વાગ્યા સુધીમાં શહેરમાં સાર્વત્રિક વરસાદ પડ્યો

અમદાવાદ, મંગળવાર

આ ચોમાસામાં મેઘરાજા અમદાવાદ પર અપાર હેત વરસાવી રહ્યા છે. જુલાઈની ૧૦મી તારીખની સાંજ પછી પડેલા મુશળધાર વરસાદને અમદાવાદીઓ ભૂલી શકશે નહીં. તે વખતની વરસાદી આફતથી બેથી ત્રણ દિવસ સામાન્ય જનજીવન પ્રભાવિત બન્યું હતું. ત્યાર પછી પણ વરુણદેવની તોફાની બેટિંગથી લોકો રાડ પાડી ચૂક્યા છે. ગઈ કાલે સાંજે પણ શહેરીજનોએ વરસાદી મારને અનુભવ્યો હતો અને રાબેતા મુજબ અમદાવાદ ફરી જળબંબાકાર બન્યું હતું, જોકે આજે સવારથી વરસાદની હાજરીના કારણે કામધંધે જનારા નોકરિયાતો, વેપારીઓ તેમજ શાળા-કોલેજના વિધાર્થીઓ મુશ્કેલીમાં મુકાયા હતા.

ગઈ કાલે સાંજના ચારથી પાંચ વાગ્યા વચ્ચે પાલડી ખાતે દોઢ ઈંચ, જોધપુર ખાતે સવા ઈંચ, મક્તમપુરા ખાતે એક ઈંચ, ખમાસા-દાણાપીઠ ખાતે લગભગ એક ઈંચ, બોપલમાં પોણો ઈંચ અને સરખેજ ખાતે અડધા ઈંચથી વધુ વરસાદ નોંધાયો હતો, પરંતુ અમદાવાદના જોધપુર, વેજલપુર જેવા વિસ્તારોમાં ફરી વરસાદી પાણી જમા થઈ ગયાં હતાં.